JOSEYAX chuym chʼallxtayasïna. Taqi yanapirinakaparuw utat khitsüna. Jilanakapampikïxäna ukhaw wal jachäna. Jilanakapax kunatarak jachpacha sapxpachänwa, janipï yatipkäntix kunat jachatapsa. Ukatwa akham säna: ‘Nayax Joseyätwa. ¿Awkijax jakaskiti?’ sasa.

Jilanakapax jan aruniw muspharapxäna. Axsarapxänwa. Ukampis Joseyax akham sänwa: ‘Mirä amp suma jakʼachasinipxam’ sasa. Jakʼachasipxäna ukhaxa akham sänwa: ‘Nayax jumanakan José sullkamätwa, khitirutix Egiptor aljapkayäta uka’ sasa.

Joseyax akham suma arunakampi saskakïnwa: ‘Aljapkista ukatxa jan jumanakax amtasipxamti. Chiqasa Diosaw Egiptor khitanitu jan jaqinakax jiwapxañapataki. Faraonaw aka markan jilïr apnaqirit uttʼayitu. Ukat jichhax jankʼaki awkijan ukaru sarasin yatiyanipxma. Akar jakasiri jutxpan sasa irptanipxam’ sasaw säna.

Ukatsti Joseyax taqiniruw qhumantäna, jampʼattʼarakïna. Faraonaxa Joseyan jilanakapaw jutapxatayna sasa parlir istʼasaxa, akham sänwa Joseyaruxa: ‘Qatatit carronak apxarusiwayapxpan awkimar ukhamaraki familianakamaru irptanipxpana. Nayaw jupanakarux Egipto uraqin kawkïr chiqatix sumäki uk churä’ sasa.

Ukham lurapxäna. Akanwa uñjasiski, Joseyax awkiparuw aruntaski, familiapax taqiniw Egiptor jutxapxäna.

Jacobun familiapax waljanïxapxänwa. Jacobumpi wawanakapampi allchhinakapampixa, taqpachanixa paqallq tunkaniw Egiptor sarxapxäna. Ukhamarakiw warminakapasa ukat walja uywatanakapasa jupanakamp chikaw sarxapxarakïna. Taqpachaniw Egipton jakxapxäna. Diosax Jacoburux Israel sasaw sut apxatäna, ukatwa israelitanaka satapxänxa. Diosan wali munat markapänwa, ukxa mayan uñjaskañäni.