Maana 25nan

Yakuba ka denbaya yɛlɛmana misira

YUSUFU ma se k’a yɛrɛ minɛ tuguni. A y’a fɔ a ka baaradenw bɛɛ ye u ka bɔ so kɔnɔ. Yusufu kelen ni a balimakɛw dɔrɔn tora tuma min na, a ye kasi daminɛ. O balala a balimakɛw la cogo min na, e ka miiri o la. U tun t’a dɔn mun na a tun bɛ ka kasi. A laban na, Yusufu y’a fɔ ko: ‘Ne ye Yusufu ye. Yala ne fa bɛ ni la hali bi wa?’

O balala kosɛbɛ a balimakɛw la, fo u ma se ka kuma. U siranna. Nka, Yusufu ko: ‘Aw ye gɛrɛ ne la.’ U gɛrɛla a la tuma min na, a ko: ‘Ne ye aw balimakɛ Yusufu de ye, aw ye min feere mɔgɔw ma minnu tun bɛ ka taa Misira.’

Yusufu kumana koɲuman u fɛ, k’a fɔ fana ko: ‘Aw kana aw yɛrɛ jalaki ko aw ye ne feere ka na Misira. Ala yɛrɛ de ye ne ci ka na Misira, walisa ka mɔgɔ caman kisi. Faraon ye ne sigi jamana bɛɛ  kunna. O la sa, aw ye teliya sisan ka taa ne fa fɛ, k’o fɔ a ye. Aw k’a fɔ a ye, ko a ka yɛlɛma yan.’

Yusufu y’i meleke a balimakɛw kan na, ka u bɛɛ da susu. Faraon y’a mɛn tuma min na ko Yusufu balimakɛw nana, a y’a fɔ Yusufu ye ko: ‘Wotorow di u ma walisa u ka taa u fa ni u ka denbayaw nɔfɛ ka na yan. Misira dugukolo yɔrɔ min ka ɲi ka tɛmɛ a yɔrɔ tɔ bɛɛ kan, ne bɛna o di u ma.’

U ye o de kɛ. Aw ɲɛ bɛ Yusufu de la yan yɔrɔ la ka a fa Yakuba kunbɛn, tuma min na Yakuba ni a ka denbaya bɛɛ nana Misira.

Yakuba ka denbaya bonyara kosɛbɛ. U nana Misira tuma min na, Yakuba ni a denw ani a mɔdenw bɛɛ lajɛlen tun ye mɔgɔ 70 ye. Nka, u musow fana nana. A ka ca a la baaraden caman fana nana u fɛ. Nin mɔgɔw bɛɛ nana sigi Misira. U welela Israɛlkaw bawo Ala tun ye Yakuba tɔgɔ yɛlɛma k’a kɛ Israɛl ye. Israɛlkaw kɛra jamakulu kɛrɛnkɛrɛnnen ye Ala bolo, i ko an bɛna o ye cogo min na kɔfɛ.

Jenɛse 45:​1-28; 46:​1-27.