JOSEF cu aa rak i sum kho ti lo. A sal vialte kha an umnak khaan chung in chuak dih u tiah nawl a rak pek hna. Amah le a unau hna lawng an tan tik ah, Josef cu a rak ṭap. A ule cu zeitluk in dah an khuaruah a har lai ti kan ruah khawh ko, zeicah a ṭah ti kha an rak hngal lo. A donghnak ah: ‘Keimah cu Josef ka si. Ka pa cu a nung rih maw?’ tiah a hung ti.

A u le cu an lau tuk i zei bia hmanh an chim kho lo. An rak ṭih fawn. Sihmanhsehlaw Josef nih: ‘Zangfahnak in ra ka naih deuh u,’ a ti hna. An va naih deuh tik ah, amah nih: ‘Keimah cu nan naupa Josef, Izipt ram i nan rak ka zuar mi kha ka si,’ a ti hna.

Josef nih cun zangfahnak aw in bia cu a chim i: ‘Hika i nan rak ka zuar ruang ah nanmah le nanmah i mawhchiat hlah u. Mi nunnak khamh awk ah Izipt ram i a rak ka thlahtu cu Pathian hrimhrim a si ko. Faraoh nih ram pumpi uktu ah a ka ser cang. Cucaah ka pa sin ah va kir zokzok u law hi kong vialte hi va chim u. Cun amah cu hika ah hin ratpi u,’ a ti hna.

Cu hnu ah Josef nih a u le cu a kuh hna i a hnamh hna. Faraoh nih Josef a u le an ra ti a theih tik ah, Josef cu: ‘Annih cu rangleng kha i lak hna seh law an pa le an innchungkhar vialte kha va au hna seh. Izipt ram i a ṭha bik mi hmun kha ka pek hna lai,’ tiah a ti.

Cu ti cun an rak tuah. Hika ah hin a innchungkhar dih lak he Izipt ram i um awk ah a ra mi a pa kha Josef nih a ton lio nan hmuh khawh lai.

Jakob a innchungkhar cu an tam ngaingai. Izipt ram i an rak i ṭhial lio ah Jakob le a fale pawl le a tule pawl cu an dihlak in 70 an si. An nupile le an salle pawl zong an i tel ve. An zapi in Izipt ram ah umhmun an khuar. Pathian nih Jakob a min cu Israel tiah a rak thlen cang caah, annih cu Israel miphun tiah an rak auh hna. A hnu ah kan hmuh te lai bang in Israel mi hna cu Pathian caah aa thleidang mi miphun an si.