ZOZEF pa ti kapab kontrol son santiman pli lontan. I ti demann tou son bann serviter pour sorti dan sa lasanm. Kan i ti tousel avek son bann frer, Zozef ti konmans plere. Nou kapab mazinen konman ki son bann frer ti sirprann, lefe ki zot pa ti konnen akoz i ti pe plere. Finalman i ti dir: ‘Mwan Zozef. Eski mon papa i ankor vivan?’

Son bann frer ti sitan sirprann ki zot pa ti kapab koze. Zot ti per. Me Zozef ti dir: ‘Silvouple apros pli pre.’ Kan zot ti aprose, i ti dir: ‘Mwan zot frer Zozef, sa enn ki zot ti vann Lezip.’

Zozef ti kontinyen koze zantiman: ‘Pa blanm zot lekor akoz zot ti vann mwan isi. Ti vreman Bondye ki’n anvoy mwan Lezip pour sov lavi bann dimoun. Faraon in etabli mwan sef dan pei antye. Aprezan degaze retourn kot mon papa e rakont li sa. E dir li vini pour reste isi.’

Apre Zozef ti anvoy son lanmen otour son bann frer, e i ti may zot e anbras zot tou. Kan Faraon ti antann ki bann frer Zozef in vini, i ti dir Zozef: ‘Les zot pran bann saret e al sers zot papa ek zot fanmiy pour ki zot vin reste isi. Mon pou donn zot sa pli bon landrwa dan Lezip antye.’

Se sa ki zot ti fer. La ou kapab vwar Zozef pe rankontre son papa kan i ti vin Lezip avek son fanmiy antye.

Fanmiy Zakob ti’n vreman agrandi. An tou ti annan 70 zot kan zot ti vin Lezip, an kontan Zakob ek son zanfan ek son bann pti zanfan. Me ti osi annan bann madanm son bann garson e petet en kantite serviter. Zot tou zot in vin reste Lezip. Zot in ganny apele konman bann Izraelit, akoz Bondye ti’n sanz non Zakob e apel li Izrael. Bann Izraelit ti vin bann dimoun spesyal pour Bondye, parey nou pou vwar plitar.