JOSÉ ndaikatuvéima ojejoko. Heʼi isiervokuérape osẽmba hag̃ua pe kotýgui. Opytámaramo haʼeño iñermanokuéra ndive, José oñepyrũ hasẽ. Mbaʼeichaitépa oiméne oñemondyirakaʼe iñermanokuéra, ndoikuaáigui mbaʼérepa hasẽ. Ipahápe heʼi chupekuéra: ‘Chéniko José. Oikovépa gueteri che ru?’.

Iñermanokuéra ndaikatúi heʼi mbaʼeve, tuichaiterei oñemondýi hikuái. Péro José heʼi chupekuéra: ‘Peñembojána koʼápe’. Ha oñembojávo hikuái, José heʼi: ‘Chéniko José, pene ermáno, pevendevaʼekue Egíptope’.

José osegi oñeʼẽ chupekuéra mborayhúpe: ‘Ani peñeñandu vai chevendehaguére koʼápe. Ñandejára chembouvaʼekue Egíptope ikatu hag̃uáicha heta hénte ojesalva. Faraón chemoĩ agoverna hag̃ua ko tetã. Upévare pyaʼe tapeho jey che ru rendápe ha peje chupe koʼã mbaʼe. Ha peje chupe ou hag̃ua oiko koʼápe’.

Upémaramo José oñañuã ha ohetũmba iñermanokuérape. Faraón oikuaávo José ermanokuéra ouhague, heʼi Josépe: ‘Togueraha hikuái umi karréta ogueru hag̃ua nde ru ha ifamiliakuérape ha tou jey hikuái koʼápe. Ameʼẽta chupekuéra pe yvy iporãvéva Egíptope’.

Haʼekuéra ojapo upéva. Koʼápe ikatu rehecha Josépe ojotopárõ itúva ndive, oúrõ guare ifamiliakuéra reheve Egíptope.

Jacob família tuichaitereíma. Jaipapáramo Jacob, itaʼyrakuéra ha inietokuéra, oĩma 70 ovárõ guare hikuái Egíptope. Péro ou avei hembirekokuéra, ha oiméne avei heta isiervokuéra. Enterove opyta oiko Egíptope. Oñehenói chupekuéra isrraelíta, pórke Ñandejára okambiavaʼekue Jacóbpe héra ha ohenói chupe Israel. Oiko chuguikuéra peteĩ puévlo espesiál Ñandejárape g̃uarã, jahechataháicha upe rire.