Eṱunḓu mari tjindire koEngipte
EHUNGI 25
Eṱunḓu mari tjindire koEngipte
JOSEF kaa yenene okuritjaerera rukwao. Eye wa raera ovakarere ve avehe ve pite metuwo. Indu tja isiwa erike nomarumbi we, Josef wa uta okurira. Omarumbi waJosef va kuminwe tjinene, mena rokutja owo kaave tjiwa kutja ma ririre tjike. Korusenina eye wa tja: ‘Owami Josef. Tate ingee u na omuinyo?’
Omarumbi we va temenwe tjinene ngandu tji ve ha yenenene okuhungira. Owo va urumine. Nungwari Josef wa tjere ku wo: ‘Arikaneye, ryameye popezu.’ Tji va ryama, eye arire tja tja: ‘Owami omuangu weṋu Josef, ngu mwa randisa koEngipte.’
Josef wa hungira komurungu momwano omuwa: ‘Amu rivere oveni mena rokutja mwe ndji randisa nguno. Tjiri, Mukuru ongwe ndji hinda koEngipte okuyekuyama omiinyo vyovandu. Farao we ndji tjita omuhonapare wehi arihe. Nambano hakahaneye mu yende ku tate mu ke mu raere ihi. Nu mu raereye kutja nge ye nu me yekutura ngwi.’
Okuzambo eye we rimanga mozosengo zomarumbi we neve pukata nokuvehupita avehe. Farao tja zuva kutja omarumbi waJosef ve ya, a raere Josef: ‘Ngave toore omatemba nu ngave kaete ihe nomaṱundu wawo ayehe nu ve kotoke ngwi. Ami me ve pe ehi ewa tjinene moEngipte atjihe.’
Owo otjinga ava tjita. Imba mo munu Josef ngu ma hakaene na ihe indu tje ya koEngipte neṱunḓu re arihe.
Eṱunḓu raJakob ra rira ene tjinene. Avehe kumwe, tji wa vara Jakob novanatje ve, novanatje vovanatje va ri 70 indu tji va tjindira koEngipte. Nungwari pa ri ovakazendu wina, ngahino novakarere ovengi wina. Avehe mba ve ya okutura moEngipte. Owo aave isanewa Ovaisrael, mena rokutja Mukuru wa rundurwa ena raJakob ri rire Israel. Ovaisrael ve yekurira ovandu vapeke ku Mukuru, otja tji matu munu kombunda.
