SAANEN a matengngel ni Jose ti rikriknana. Pinapanawna amin nga ad-adipenna idiay siled. Kalpasanna isun ti agsangit. Agasem ti pannakakellaat dagiti kakabsatna ta, saanda nga ammo no apay nga isut’ agsangsangit. Iti kamaudiananna kinunana: ‘Siak ni Jose. Sibibiag pay kadi ni amak?’

Nakellaat dagiti kakabsatna a saanda a makasao. Agbutengda. Ngem nagsao ni Jose a siaasi kadakuada.

Kuna ni Jose: ‘Dikay pabpabasolen ti bagiyo gapu ta inlakodak ditoy. Kinapudnona ti Dios ti nangibaon kaniak ditoy tapno maisalakan ti biag dagiti tattao. Ita agganatkayo nga agsubli ken amak ken ibagayo kenkuana daytoy.’

Idi kuan inyarakup ni Jose ti im-imana kadagiti kakabsatna ken inag-agkanna amin ida. Idi nangngeg ni Paraon nga immay dagiti kakabsat ni Jose, kunana ken ni Jose: ‘Pagawidem ida ket alaenda ni amada ken ti pampamiliada ket agsublida ken agnaeddanto ditoyen.’

Isu dayta ti inaramidda. Ditoy makitam ni Jose a sabsabatenna ni amana idi immay idiay Egipto agraman intero a pamiliana.

Iti dagupda adda idi 70 iti pamilia ni Jacob idi immakarda idiay Egipto, agraman ni Jacob ken dagiti annakna ken dagiti appokona. Adda met dagiti assawa a babbai, ken nalabit adu nga ad-adipen. Amin dagitoy ti nagtaeng idiay Egipto. Isuda ti maaw-awagan dagiti Israelitas, agsipud ta sinukatan ti Dios ti nagan ni Jacob iti Israel. Dagiti Israelitas ti nagbalin a naisangsangayan a tattao iti Dios kas ti intayto makita.