JOSẸF ọ gbẹ sae nyẹ oma riẹ ofa ha. Ọ tẹ ta kẹ idibo riẹ kpobi nọ a no ubrouwou na no. Nọ ọye avọ imoni riẹ evo a jẹ rọ, Josẹf o te muhọ ẹviẹ. Ma sai roro epanọ onana u re gbe imoni riẹ unu te, keme a riẹ oware nọ osoriẹ ze nọ ọ jẹ be viẹ hẹ. Urere riẹ ọ tẹ ta nọ: ‘Mẹ họ Josẹf. Ọsẹ mẹ ọ gbẹ rọ uzuazọ?’

U gbe imoni riẹ unu te epanọ ae a gbẹ jẹ sae t’ẹme he. Ozọ u bi mua’e. Rekọ Josẹf ọ tẹ ta: ‘Iviena wha go ze.’ Nọ a je go ze, ọ tẹ ta: ‘Mẹ, Josẹf omoni rai, ọnọ wha zẹ kpohọ Ijipti.’

Josẹf ọ tẹ gbẹ ta ẹme kae, eva edhere owowolẹ: ‘Wha du fua oma rai nnọ wha zẹ omẹ ze obonẹ hẹ. Ọghẹnẹ họ ọnọ o vi omẹ ze Ijipti ro siwi izuazọ ahwo. Fẹro ọ rehọ omẹ mu osu orẹwho na soso. Fikiere enẹna wha nya ovẹrẹ bru ọsẹ mẹ re wha ta enana kpobi kẹe. Yọ wha ta kẹe re ọ nyaze te ria obonẹ.’

Kẹsena Josẹf o te fi abọ wariẹ imoni riẹ, ọ tẹ gbalae jẹ viọlae kpobi. Nọ Fẹro o yo nọ imoni Josẹf e nyaze no, ọ tẹ ta kẹ Josẹf: ‘Jọ a rehọ ekẹkẹ re a nya e rehọ ọsẹ rai gbe ikru rai re a zihe ze etenẹ. Mẹ te rehọ otọ nọ o mai woma eva Ijipti kae.’

Ere a ru. Etenẹ whọ sae ruẹ Josẹf nọ o bi zere ọsẹ riẹ okenọ ọ ze obọ Ijipti avọ uviuwou riẹ kpobi.

Uviuwou Jekọp o te rro gaga no. Ai kpobi a bu te 70 eva okenọ a kpohọ obọ Ijipti, a te kele Jekọp avọ emọ riẹ gbe emọ-iruọmọ riẹ. Rekọ eyae rai e jariẹ re, gbe, otiẹsejọ, idibo buobu re. Enana kpobi i te wohọ obọ Ijipti. A se rai Ahwo-Izrẹl, keme Ọghẹnẹ o nwene odẹ Jekọp fihọ Izrẹl. Ahwo-Izrẹl na a te ti zihe ruọ ahwo oghẹrẹ sa kẹ Ọghẹnẹ, wọhọ epanọ ma te ruẹ oke ofa.