CHOOSƐ ndoo nɔla lɛ kɔl ndɔɔ ba tiu kposoŋ te. Le hei, mbo dimul buɛiyaa nduaa kpou le ma fula wɔ chiɛiniŋ. Mɛɛ nda lo nda bɛndaa nduaa kpeele, mi Choosɛ kandu chaŋndo. Mi kɔndɔfillo bii bɛndaa nduaa, kanifuule ndaa sina le nyɛ o wa chaŋndo wo le. Mbo dimi o mɛɛlulaŋ aa: ‘Ya cho Choosɛ ni. Kɛkɛ cho wɔ pa yoomu?’

Bakoo bɛɛ bɛndaa nduaa nɔla ma soo le, a mɛɛ suɛi kalɛi woolu nda yɛ. Okoŋ, mi sioonde bii nda. Kɛ mi Choosɛ dimi aa: ‘Yandii la sɔɔŋguu ya machɛlu naŋ.’ Mɛɛ nda sɔɔŋguu ndu ikɛi, mbo dimi aa: ‘Ya cho Choosɛ pɔmbɔ nya ni, o nya pisi teleŋ koŋ Ichipi wo.’

Mi Choosɛ hiau lachi a nda dɛɛniaa aa: ‘La biinaŋ la tɔɔyaŋ le mɛɛ nya pisi ya naŋ yɛ le. Mɛlɛka kpeekpei yɔŋ ya nya lachi Ichipi naŋ ni, le yoomula waŋchieeya kiindiaa. Felo siiŋguu ya masaa le lɛŋnde Ichipileŋ kpou. Lelaŋ, la miiŋgu niko chɔ chɔ naa kɛkɛ cha, mila kɔ dounuŋ ndu kona lende kinɛi. Nduyɛ, mila dimul ndu mbo huŋ wa nanuŋ.’

Mɛɛ mi Choosɛ kɔɔmiaŋ niko bɛndaa nduaa mɛɛ nda cho fau, nduyɛ mbo sɔsa nda kuulaŋ kpou. Mɛɛ Felo tuei maa bɛnduaa Choosiaa hiŋ, mbo dimul Choosɛ aa: ‘A chua nyɛm nyaananŋndoŋ, ma kɔ huŋ a finya nda vɛlɛa yungula ndalaŋ nanuŋ. Fondaŋ kɛndɔɔ le Ichipi naŋ kpou ya cho nda ke ni.’

Lende kinɛi nda tosa ni. Nuawɔ bɛɛ Choosɛ finya ndɔ kɔmaŋndo teleŋ o hiŋ Ichipi a yungu ndɔɔ fau wo.

Mi yuŋgu Chekɔpoo kui tau tau. Chekɔpu ni, chuauwaa nduaa ni, vɛlɛa chuaa nduaa mamaa kpou, ŋwaŋ 70 nda wa ni boondii nda kuɛ Ichipi ve. Kɛ o fula o haa kɔɔli, wanaa cheleŋ wa vɛlɛ. Nda cho ni, laanduaa chuauwaa ndaa, vɛlɛa buɛiya tau. Nda kpou ma kɔ chal Ichipi. Ma sɔla veelɔŋndo aa Isɔluɛitiiya, kanifuule Mɛlɛka siŋga diola Chekɔpulaŋ aa Isɔluɛi. Mi Isɔluɛitiiya simnuŋ wanaa sɔwɛa pila o Mɛlɛka lo. Ŋ nɔ le hunɔɔ pɛɛkoo a nda okɔɔ.