Icisimicisyo 25: Ulupwa Lwakukila ku Ijipiti
JOSEFI afilwa ukutwalilila ukulama ifi alukumfwa. Abula bonse abapyunjisi bakwe ukufumamo mu cipinda. Ili asyala ne bakwabo, Josefi atatika ukulila. Koti twaalakanya ifi abakwabo bakankamana, pakuti tabesibilepo icalenga ati alukulila. Mukupelako alabila ati: ‘Nine Josefi. Kani batata bacili ne mweo?’
Abakwabo bakankamana ukwakuti bafilwa ne kulabila. Baumfwo’mwenso. Pano Josefi alabila ati: ‘Ndukumukombeteleni ukumpalamina.’ Ili bapalamina, alabila ati: ‘Nine Josefi umukwabenu, ene mwasitisye ku calo ca Ijipiti.’
Mukuba ne nkumbu Josefi atwalilila ukulabila: ‘Mwilikalipila pakuti pa kunsitisya kuno. Muli bucine baLesa balintumine ku Ijipiti mu kupulusya imyeo ya bantu. Falo alimpele amakosa akuteka icalo conse. Lomba endesyeni muye kuli batata ne kulabila kuli bo ifi nalabila. Kabili mukababule ukwisa mu kwikala kuno.’
Popele Josefi akumbata abakwabo, kabili abafyontapo bonse. Ili Falo aumfwa ati abakwabo Josefi baisa, abula Josefi ati: ‘Ubabule bapinte ingolofwana ne kuya bakabalete bawisibo ne ndupwa syabo bakese kuno. Nkabapela umupunda uuweme pali yonse iili mu Ijipiti.’
Fyenke’fyo efi bacitile. Apa koti wabona Josefi alukukumanya bawisi ili baisile ku Ijipiti ne lupwa lwabo lonse.
Ulupwa lwakwe Yakobi lwalikulile makosa. Bonse pamo baali 70 ili bakukile ku Ijipiti, ukupenda Yakobi, abana bakwe, ne bensikulu bakwe. Lomba paali ne bakasi babo, cipale ne basya abengi. Aba bonse balikele mu Ijipiti. Balukwitwa ati abaIsilaeli, pakuti baLesa balyalwile isina lyakwe Yakobi ati Isilaeli. AbaIsilaeli balibele bantu abalibelele kuli baLesa, koti fintu twakubona kuntangile.
Ifyakutaŋga 45:1-28; 46:1-27.
Ifyakwipusya
- Mba nifindo fyacitika ili Josefi alifisulula ku bakwabo?
- Kani nifindo mu kuba ne nkumbu ifi Josefi alondolola ku bakwabo?
- Mba nifindo Falo alabila ili aumfwa pa fya bakwabo Josefi?
- Kani ulupwa lwakwe Yakobi lwali syani ubukulu ili bakukiile ku Ijipiti?
- Kani ulupwa lwakwe Yakobi lwalisile mu kwitwa syani, kabili mba nindo lwaitilwe’fyo?
Ifyakwipusya na fimbi
- Pendeni Ifyakutaŋga 45:1-28.
Kani ilyasi lya mu Baibolo ilyakwe Josefi lilalangisya syani ukweba’ti baYehoba bangaalula ifyali ne kuleto’kusomenwa pa bapyungisi babo ukuleta ifiweme? (Taŋ. 45:5-8; Yisa. 8:10; Filip. 1:12-14)
- Pendeni Ifyakutaŋga 46:1-27.
Mba nifindo baYehoba balaile Yakobi ili alukuya ku Ijipiti? (Taŋ. 46:1-4.)
