Tanga Naiya kuEjipitu
Chihande 25
Tanga Naiya kuEjipitu
YOSEFWE kuhasa kuliunjika chiku. Hikulweza vangamba jenyi vosena valovoke muzuvo. Hakusala navandumbwenyi, Yosefwe namulikumbu lyakulila. Tunahase kuhumikiza muvanalikomokela vandumbwenyi, mwomwo kavejivile ovyo anakulililako. Omu natulisa kulila, himwavalweza ngwenyi: ‘Yami Yosefwe. Tata achili wamutonyi tahi?’
Vandumbwenyi vanalikomokela mutunwa kaha asa. Valizuzukilile. Oloze Yosefwe ngwenyi: ‘Achi pandamenu kuli ami.’ Omu vanalingi ngocho, himwavalweza ngwenyi: ‘Yami songo yenu Yosefwe, mwalanjishile kuEjipitu.’
Yosefwe chimwahanjika nalikoji ngwenyi: ‘Kanda namulyamba ngwenu mwapihishile hakungulanjisa kunoko. Kalunga ikiye angutumine kuEjipitu mangana ngukalwile myono yavatu. Fwalo nangupwisa muka-kuyula mulifuchi lyosena. Shikaho yenu washi kuli tata mukamulweze. Kaha kamulwezenu akeze nakutwama kuno.’
Yosefwe hikuvakwata mujishingo, nakuvapakata mutusamba nakuvasweswenya. Fwalo hakwivwa ngwavo vandumbwaYosefwe vaneza, himwalweza Yosefwe ngwenyi: ‘Valweze vambate matemba vakambate sevo najitanga javo josena nakuhiluka kuno. Nangukavahana chihela chahambakanaho kuwaha havihela vyosena muno muEjipitu.’
Mukiko valingile. Hano unakumona Yosefwe anakusambilila ise hakwiza kuEjipitu natanga yosena.
Tanga yaYakova yatohwele chikuma. Hakuvalava vaYakova navana venyi navazukulu halwola vayile kuEjipitu, vahetele 70. Oloze hapwile namapwevo javo, navangamba vavavulu nawa. Vosenava vatungile muEjipitu. Vavavulukilenga ngwavo vaIsalele, mwomwo Kalunga alumwine lijina lyaYakova kupwa Isalele. VaIsalele vavalingishile kupwa vatu vakulipwila vaKalunga, nge omu natumona kulutwe.