JOSEFA chu a insum zo ta ngang lo va. Pindan chhuahsan turin a chhiahhlawh zawng zawng a hrilh a. A unaute nen chauhva an awm veleh Josefa chu a tap ta a. A tahna chhan an hriat loh vanga a unaute hrilhai turzia kan ngaihruat thei. A tawpah chuan: ‘Josefa kha ka ni. Ka pa a la dam em?’ a ti ta a.

A unaute chu an hrilhai lutuk a, an tawng thei lo va. An hlau va. Mahse Josefa chuan: ‘Khawngaihtakin lo hnai teh u,’ a ti a. An hnaih veleh: ‘Aigupta-a in hralh, in unaupa Josefa kha ka ni,’ a ti ta a.

Josefa chuan ngilnei takin a sawi zel a: ‘Heta mi hralh vang hian inthiam lo suh u. Mite nunna chhandam tura Aigupta-a mi kaltirtu chu Pathian a ni tak zet si a. Pharaoa chuan ram pum pui awptuah mi siam tawh a. Chuvangin ka pa hnenah haw thuai ula, hei hi hrilh rawh u. Tin heta lo kala cheng turin hrilh rawh u,’ a ti a.

Tin Josefa chuan a unaute chu a kuah a, a pawm a, an vaiin a fawp a. Josefa unaute an lo kal tih Pharaoan a hriatin Josefa hnenah: ‘Tawlailirte kentir la, an pa leh an chhungte va hruai sela hetah lo kir rawh se. Aigupta zawng zawnga ram tha ber an hnenah ka pe ang e,’ tiin a hrilh a.

Chutiang chuan an ti ta a. Hetah hian a chhungkaw pum puia Aigupta-a an lo kal lai a Josefan a pa a hmuak lai i hmu thei.

Jakoba chhungkua chu an tam ta em em a. Aigupta a an pem lai chuan Jakoba leh a fate leh a tute chhiarin 70 an ni a. Mahse an nupuite pawh an awm a, chhiahhlawh pawh tam tak an awm mai thei. Chung zawng zawng chu Aigupta-ah an cheng ta a. Jakoba hming chu Pathianin Israela tia a thlak tawh vangin Israel-mite vuah an ni. A hnua kan la hriat tur angin, Israel-mite chu Pathian tana mi hran bik deuh an lo ni a.