MITIʼTL ikʼx tuʼn José. Xi tqʼamaʼn kye tmajen tuʼn kyex. Tejtzen tkyaj ten tjunal kyukʼe terman, ok ten José oqʼel. Qa ma qo ok ten ximil tiʼj jlu bʼiʼxlo jaw naj kynabʼil, moqa e jaw kaʼylaj, terman José, tuʼnju mitiʼtaq bʼiʼn kyuʼn tiquʼn noqʼtaq. Pontzen ambʼil tuʼn t-xi tqʼamaʼn: ‹Aqine José. ¿Itzʼxpe nmane?›

Mintiʼtl bʼant ttzaqʼwet José kyuʼn terman, tuʼnjo oteq chi tzaj xobʼ. Xi tqʼmaʼn José kye: ‹Che laqʼetze›. Tejtzun kypon laqʼe ttxlaj, xi tmaʼn kye: ‹Aqine José aju kyermane, aju tzaj kykʼayine tuj Egipto›.

Tukʼe kʼujlabʼil xi tqʼamaʼn José kye: ‹Miʼn che bʼisune ex miʼn tzaj kyqʼoje kyxole tiʼjju ntzajlen kykʼayine tzalu, tuʼnju ate Dios tzaj samante weye toj Egipto tuʼn kyklet xjal. O chin ok tqʼoʼne Faraón te ajkawil te onilte tibʼaj ttxʼotxʼ Egipto. Tuʼntzunjo, ku kyxiʼye jaʼlexix tukʼil nmane ex kymanxe jlu te, tuʼn ttzaj anqʼil tzalu›.

E tzajtzun tchleʼn José ex el ttzʼubʼan kytziʼ kykyaqil terman. Tejtzen tok tbʼiʼn Faraón qa otaq che pon terman José, xi tqʼamaʼn te: ‹Qʼamanxa kye termaniye tuʼn t-xi kyiʼn carret ex tuʼn ttzaj kyiʼn kyman ex kykyaqil toj kyja tzalu. Ok kxel nqʼoʼne aju tbʼanelxix txʼotxʼ at toj Egipto kye›.

Iktzun bʼantjo kyuʼn. Ik tzeʼn ntila (ntlome) tzalu, lu José nqʼolbʼen te ttat tej tul Egipto kyukʼex kykyaqil tuj tja.

Otaq chʼiy kybʼet Jacob tej kyxiʼ Egipto. Setentatoqtl kybʼet Jacob kyukʼex tkʼwaʼl ex qe tal tchman. Nya oʼkxju ax ikx ateʼqetoq kyxuʼjel ex nimqelo majen. E najantzun kykyaqil xjal lu tuj Egipto ex ok qʼoʼn kybʼi te aj Israel, tuʼnjo oteq kubʼ tchʼixpuʼn Dios tbʼi Jacob te Israel. E ok te jun tbʼanel ttnam Dios, ik tzeʼn kelel qnikʼ tiʼj.