TLAPOUALISTLI 25

Ichanejkauan Jacob ochantitoj Egipto

JOSÉ ayakmo kixikoa. Uan kinmiluia nochtin itlakeualuan ma kisakan. Ijkuak José mokaua san iuan ikniuan, peua choka. Uelis timokuayejyekoskej ken ikniuan motlajtlachialtiaj, pampa amo kimatij tleka choka. Saiktlami, ye kinmiluia: ‘Ne niJosé. ¿Ok yoltok notajtsin?’.

Ken ikniuan José sapanoa omotlajtlachialtijkej, amo uelij otlajtojkej. Omomojtijkej. Axkan, José okinmilui: ‘Xiualakan nonauak, namechtlatlaujtia’. Ijkuak yokatkaj inauak, José okijto: ‘Ne namokni José, akin onankinemakakej itech Egipto’.

Ika tlasojtlalistli José okinmilui ikniuan: ‘Amo ximotlajtlakoltikan pampa onechnemakakej nikan. Pampa toTajtsin Dios ye akin onechualtitlanki nikan Egipto pampa nikinmakixtis tlaltikpaktlakamej. Faraón yonechtlali pampa nitlanauatis itech nochi nin ueyi altepetl. Ik non, totoka ximokuepakan ikalijtik notajtsin uan xiktlapouikan itech nochi nin. Uan xikiluikan nikan ma chantiki’.

Ijkuakon, José okinnapalo nochtin ikniuan, uan okinmixpipitso. Ijkuak Faraón okimatki ikniuan José oualajkej, okilui José: ‘Ma kiuikakan carretas uan ma kiualikakan intajtsin uan ichanejkauan uan ma ualmokuepakan nikan. Nikinmakas tlali tlen okachi kuali itech Egipto’.

Uan ijkon okichijkej. Nikan tikita ken José kitlajpalojtok itajtsin ijkuak oajsito Egipto iuan nochtin ichanejkauan.

Ichanejkauan Jacob okatkaj miakej. Nochtin okatkaj 70 ijkuak oyajkej Egipto, Jacob, ipiluan uan ixuiuan. Noijki ompa okatkaj insiuaj, uan noijki uelis miakej intlakeualuan. Nochtin opejkej chantij Egipto. Okintokayotijkej israelitas, pampa toTajtsin Dios okipatili itoka Jacob ika Israel. Israelitas omochijkej se altepetl tlen okipiaya miak ipati ixpan toTajtsin Dios, ken satepan tikitaskej.

Génesis 45:1-28; 46:1-27.