JOSE ketyivilile vali okuliholeka. Moluotyo, watolela ovaundapi vae valupuke pondye. Etyi Jose esalamo vala novakulu vae, ahimbika okulila. Ovakulu vae ankho vahuva, mokonda ankho kavetyii oityi alilila. Konyima ati: ‘Ame Jose. Tate nkhele una omuenyo?’

Iya ovakulu vae avahuvu unene, avehetyivili vali okupopia. Mokonda ankho vatila ouoma. Mahi, Jose ati: ‘Fuenei kuno.’ Etyi vafuenako, Jose ati: ‘Ame ndenge yenyi Jose, una mualandesile ko Egitu.’

Jose atualako okupopia navo nawa okuti: ‘Mutupu onkhali etyi muandandesa kuno. Tyotyili o Huku wanthuma ko Egitu pala okuyovola omienyo viovanthu. Farao wamphaka koutumini wotyilongo atyiho. Pahe, kondokei liwa ku tate, kemutolelei atyiho. Iya mupopilei eye akale kuno.’

Jose wayumbahi oviti viae pohi, ahumbakana ovakulu vae, eveavela onombesinyu. Etyi Farao etyiiva okuti ovakulu va Jose veya, watuma okupopila Jose okuti: ‘Veavela omatemba vakapole tate yavo no nombunga mbavo, veye vakale kuno. Ame mandyivepe ohika ongwa mo Egitu.’

Iya avalingi ngotyo. Tala Jose polutalatu apa ukahi nokuyakula tate yae, puetyi ehika mo Egitu nombunga yae.

Ombunga ya Jako ankho yalinga onene unene. Etyi vailukila ko Egitu, ankho vali 70 ovanthu okuvalulila kumue Jako novana vae, novatekula vae. Tupu ankho pena ovakai vavo, novaundapi ovanyingi. Aveho ovo vailukila ko Egitu. Ankho vatiwa ova Isilayeli. Mokonda Huku ankho wapilulula enyina lia Jako, emuluku Isilayeli. Ova Isilayeli ankho ovanthu vamwe vakolela unene va Huku, ngetyi matukatala komutwe.