DWOSEFI angola ɔ nwo sɔ bieko. Ɔmanle ye sonvolɛma ne amuala vi sua ne anu vindele. Mɔɔ ɔhale ɔ nee ɔ mediema ne mɔ angome la, Dwosefi zunle. Yɛkola yɛnwu kɛzi ɛhye zinle ɔ mediema ne mɔ anwo la, ɔboalekɛ ɛnee bɛnze deɛ mɔɔ ɔti ɔlɛsu la. Na ɔhanle kɛ: ‘Medame a mele Dwosefi. Egya tɛte aze ɔ?’

Ɔzinle ɔ mediema ne mɔ anwo mɔɔ bɛangola bɛ nloa anu tɛ a. Bɛ ahonle dule. Noko Dwosefi zele kɛ: ‘Mebodo bɛ bɛbikye me.’ Mɔɔ bɛhwenle bɛbikyele ye la, ɔzele bɛ kɛ: ‘Bɛ diema Dwosefi, mɔɔ bɛdɔnenle ye bɛmanle bɛ nee ye hɔle Yigyibiti la a le me.’

Dwosefi hɔle zolɛ dendɛle adenle kɛnlɛma zo kɛ: ‘Bɛmmafa bɛ nwo ɛya kɛ bɛdɔnenle me bɛmanle bɛ nee me rale ɛke a. Nyamenle a zoanle me Yigyibiti kɛ membanlie menli ngoane a. Falo ɛva me ɛzie maanle ye kɔsɔɔti azo kpanyinli. Yemɔti bɛha bɛ nwo waa bɛhɔ egya ɛkɛ na bɛha ɛhye mɔ amuala bɛhile ye. Na bɛha bɛhile ye kɛ ɔrɛla ɔradɛnla ɛke.’

Akee Dwosefi vale ɔ sa ɔbɛkale ɔ mediema ne mɔ akɔme, ɔbetanle bɛ, na ɔvole bɛ muala bɛ nvoka anwo. Mɔɔ Falo dele kɛ Dwosefi amediema ne mɔ ɛra la, ɔzele Dwosefi kɛ: ‘Maa bɛva ehwili na bɛhɔva bɛ ze nee bɛ sua nu amra amuala bɛrɛla. Mebamaa bɛ azɛlɛ mɔɔ le kpalɛ tɛla biala wɔ Yigyibiti ɛke la meamaa bɛadɛnla zolɛ.’

Zɔhane ala a bɛyɛle a. Nea Dwosefi kɛ yehɔyia ɔ ze mɔɔ ɔ nee ye sua nu amra amuala ɛlɛba Yigyibiti la wɔ ɛke ɛ.

Gyekɔbo abusua ne rayɛle kpole. Mekɛ mɔɔ bɛba Yigyibiti la, ɛnee Gyekɔbo nee ɔ mra yɛɛ ye nlɔnra ne mɔ amuala le 70. Noko ɛnee bɛ ye mɔ, yɛɛ bie a, bɛ sonvolɛma dɔɔnwo noko boka nwolɛ. Ɛhye mɔ amuala radɛnlanle Yigyibiti. Bɛvɛlɛle bɛ Yizilayɛma, ɔboalekɛ ɛnee Nyamenle ɛhakyi Gyekɔbo duma ɛyɛ ye Yizilayɛ. Yizilayɛma ne rayɛle maanle titile bie manle Nyamenle, kɛmɔ yɛbazukoa ye amozii la.