RÄ Jose ya himbi ze̱ti. Bi xipi gatꞌho yä ꞌme̱go ge dä bo̱ni de rä kuarto. Mi gohise̱ rä Jose ko yä ku, rä Jose bi mu̱di bi nzoni. Dä za gä dahu̱ ngue̱nda hanja nuꞌu̱ yä ku himbi bädi te dä mää ngeꞌä himi pädi por hanja mi zoni rä Jose. Pe näꞌä ya himbi ze̱ti ꞌne bi ꞌñenä: “Go geke drä Jose. ¿Tetho mä dada?”.

Nuꞌu̱ yä ku himi pädi ha dä nja ꞌne himi tsa dä ñä. Nuꞌu̱ bi ntsu. Pe rä Jose bi ꞌñenä: “Jakhu̱ rä mäte guä ehehu̱”. Nuꞌu̱ yä ku bi yꞌo̱de ꞌne bi uatꞌi, nubye̱ rä Jose bi ꞌñenä: “Go geke ri kuhu̱ Jose, näꞌä gä pahu̱ ha Ejipto”.

Ko rä mäte, rä Jose bi sigi bi ñä: “Ogi ñho̱xäthaihu̱ ngeꞌä gä pagägihu̱ pa gekua. Di pädi ge Äjuä go geꞌä bä pe̱nkägi ha Ejipto pa gä ñämbäbi yä te yä jäꞌi. Rä Faraon bi hñuxkägi gä ndä ha gatꞌho Ejipto. Hänge nguntꞌä pengihu̱ pa gi xipäbihu̱ mä dada. ꞌNe xipihu̱ ge dä ehe ja dä mꞌu̱kua”.

ꞌNepu̱ rä Jose bi hyu̱fi ꞌne bi zu̱ꞌtsi gatꞌho yä ku. Mi yꞌo̱de rä Faraon ge yä ku rä Jose xki zo̱ho̱, bi ꞌñembäbi rä Jose: “Dä hñäxä yä tsanza nuꞌu̱ ri ku pa duä ehe ri dada ꞌne gatꞌho rä familia pa gekua. Ma gä umbäbi näꞌä rä hai xa xä ñho de gatꞌho Ejipto”.

Geꞌä bi me̱fi nuꞌu̱ yä ku rä Jose. Ha rä kꞌoi dä za gi hyandi rä Jose di ze̱njua rä dada nuꞌmu̱ bi zo̱ho̱ ko gatꞌho rä familia ha Ejipto.

Rä familia rä Jakob xki xu. Gatꞌho rä familia rä Jakob, yä bätsi ꞌne yä ꞌme̱to mi 70 nuꞌmu̱ nuyu̱ bi ma bä ꞌmu̱i ha Ejipto. Pe ꞌnehe mi ñꞌoui yä ꞌme̱hñä ꞌne ndunthi yä ꞌme̱go. Gatꞌho nuyu̱ bi mu̱di bi mꞌu̱ ha Ejipto. Bi tꞌembi yä israelita, ngeꞌä Äjuä xki patuäbi rä thuhu rä Jakob ꞌne bi ꞌñembäbi rä Israel. Jeoba bi zo̱ho̱ bi hyandi yä israelita ngu nꞌa rä hogä hnini, ja ngu ma gä handihu̱ mꞌe̱fa.