KARE e rauka akaou ia Iosepha te akakoromaki i tona aue ngakau. Kua akakite aia ki tona au tavini pouroa kia aere ki vao. Iaia ko ratou ua e tona au tuakana, kua aue a Iosepha. Ka rauka ua ia tatou te akamanako i te poitirere o tona au tuakana, no te mea kare ratou i kite e eaa aia i aue ei. I te openga ra, kua karanga atu aia e: ‘Ko Iosepha au. Te ora maira rai toku papa?’

Kua poitirere tikai tona au tuakana, kare i kite e eaa ta ratou ka tuatua. Kua mataku ratou. Inara, kua karanga a Iosepha e: ‘Akavaitata mai ana, ine.’ I te vaitata anga mai ratou, karanga atu aia e: ‘Ko Iosepha au, to kotou teina, ta kotou i oko ki to Aiphiti.’

Kua tuatua ua atu a Iosepha ma te maru e: ‘Auraka e akaapa ia kotou no tei oko iaku ki konei. Na te Atua tikai au i tuku mai ki Aiphiti kia akaora i te tangata. Kua akariro a Pharao iaku ei tutara i te enua katoa. No reira e oki viviki atu i teianei ki ko i toku papa, e akakite atu i teia. E karanga atu kiaia kia aere mai e noo i konei.’

I reira kua takave a Iosepha i tona au tuakana, e kua ongi ia ratou pouroa. I te akarongo anga a Pharao e kua tae mai te au tuakana o Iosepha, kua akakite aia kia Iosepha e: ‘Oronga i te au pereoo kia apai ratou e kia tiki i to ratou papa e to ratou au pamiri, e kia oki mai ki konei. Ka oronga atu au kia ratou te enua meitaki roa atu i Aiphiti katoa nei.’

Kua rave ratou i te reira. I konei ka kite koe ia Iosepha e aravei ra i tona papa i te tae mai anga ki Aiphiti e tona pamiri pouroa.

Kua maata roa mai te pamiri o Iakoba. E 70 ratou i te aere mai anga ki Aiphiti, me tareia a Iakoba, tana tamariki e tana au mokopuna. Kapiti katoa mai te au vaine, pera te au tavini e manganui. Kua noo pouroa ratou ki Aiphiti. Kua kapikiia ratou e ko te ngati Iseraela, no te mea kua taui te Atua i te ingoa o Iakoba kia Iseraela. Kua riro mai te ngati Iseraela ei iti tangata akaperepereia e te Atua, mei ta tatou ka kite a muri mai.