JOSEPH akanga bê ti lo gbä. Lo tene na azo ti kua ti lo kue ti sigigi. Tongana Joseph angbâ gi lo oko na aita ti lo, lo komanse ti toto. Bâ tongana nyen bê ti aita ti lo adö, ndali ti so ala hinga pëpe nda ni so lo yeke toto. Na nda ni, Joseph atene: ‘Mbi yeke Joseph. Babâ ti mbi angbâ na fini?’

Li ti aita ti lo akpe kue si ala hinga tënë so ala lingbi ti tene pëpe. Mbeto agbu ala. Me Joseph atene: ‘Ala ga nduru na mbi.’ Tongana ala pusu nduru, lo tene: ‘Mbi yeke ita ti ala Joseph so ala kä na azo ti Égypte.’

Joseph angbâ ti sara tënë na ngangu pëpe, lo tene: ‘Ala gi bê ti ala pëpe ndali ti so ala kä mbi si mbi ga ge. Biani a yeke Nzapa si atokua mbi na Égypte ti sö fini ti azo. Pharaon azia mbi mokonzi ti kodoro ni kue. Tongaso, ala kiri na kodoro hio na ala tene na babâ ti mbi atënë so kue. Ala tene na lo ti ga ti duti ge.’

Na pekoni, Joseph atï na go ti aita ti lo, lo toto na lo su ngbangba ti ala kue. Tongana Pharaon amä so aita ti Joseph aga, lo tene na Joseph: ‘Zia ala mû apuse ala gue amû babâ ti ala na asewa ti ala na ala kiri ge. Mbi yeke mû na ala sese na Égypte so ayeke nzoni ahon atanga ni kue.’

Ala sara tongaso. Jacob aga na sese ti Égypte na sewa ti lo kue. Bâ na lê ti foto so Joseph na tingbingo babâ ti lo.

Sewa ti Jacob aga mingi. Azo ti sewa ti lo kue ayeke lani 70 na ngoi so ala ga na Égypte, tongana a diko Jacob na amolenge ti lo na atarä ti lo. Me na tere ni, awali ti amolenge ni nga peut-être azo ti kua mingi ayeke dä nga. Ala kue aga asara kodoro na Égypte. A iri ala azo ti Israël, ngbanga ti so Nzapa achangé iri ti Jacob ti ga Israël. Ala ga azo so Nzapa abâ ala nde na tanga ti ambeni mara, tongana ti so e yeke bâ ande.