YOOSEEFI xa cinca hoogi. Soqqamaanosi baala mininni fulle yii. Isi callisi roduuwisi ledo gate, wiˈla hanafi. Roduuwisi mayira wiˈlannoro affinokki daafira, mageeshsha jajjartinoro heda dandiineemmo. Hakkiinnino Yooseefi, ‘Ani Yooseefiiti. Anniˈya lubbote no?’ yiinsa.

Roduuwisi masse coyiˈra hooggu. Lowo geeshsha waajjitu. Ikkollana Yooseefi, ‘Anewa shiqqi yiiyye’ yiinsa. Shiqqi yitu gedensaanni, ‘Ani Gibitsete hirtinie rodooˈne, Yooseefiiti’ yiinsa.

Yooseefi shaqqillunni lede, ‘Hirtinoonnie daafira saalfattinoonte. Mannu lubbo gatisate ane Gibitse soyinoehu Maganoho. Feeriooni ane tenne gobbara nugusa assinoe. Konni daafira rakkine martine tenne anniˈyara kulle. Koye daye heeˈranno gedeno kullesi’ yiinsa.

Hakkunni gedensaanni, Yooseefi roduuwasi mitto mittonka hanqafe sunqinsa. Feeriooni Yooseefi roduuwi dagginota macciishshiti, Yooseefi, ‘Roduuwikki farashshu gaare massite annansanna ayiddensa haadhe higgona. Anino Gibitsete gobbara doorantino base eemmonsana’ yii.

Yooseefi roduuwino yinoonninsata assitu. Kuneeti Yooseefi annasi woˈma maatesi ledo Gibitse dayeenna daae yaanna lai.

Yaaqoobi maate halaˈlado ikkitino. Maatesi Gibitse hadhu wote, oososinna oosote oososi mitteenni gamba yite 70 ikkitanno. Ikkollana meentinsanna lowo soqqamaanono no. Kuni manni baalu Gibitse haˈri. Maganu Yaaqoobi suˈma Isiraeeli yee soorrino daafira, insa, Isiraeelete gosa yinanni. Isiraeelete gosa Maganoho baxxitino daga ikkitino; tenne albaange ronseemmo.