JOSEFA wehluleka kutibamba embikwetisebenti takhe. Ngako-ke watitjela kutsi atiphumele ngephandle. Ngalesikhatsi sekasele nabomnakabo, Josefa wakhala. Bomnakabo bamangala nabambona, ngoba bebangati kutsi ukhalelani. Ekugcineni watsi kubo: ‘Phela mine nginguJosefa; babe usaphila yini?’

Kodvwa bomnakabo betfuka kakhulu behluleka nekukhuluma, ngenca yekwesaba. Josefa watsi: ‘Sondzelani.’ Ngalesikhatsi basondzela, watsi: ‘Ngingumnakenu Josefa, loyo lenamtsengisa eGibhithe.’

Kodvwa wachubeka wakhuluma nabo ngemusa watsi: ‘Ningakhatsateki ngekutsi nangitsengiselani. BekunguNkulunkulu lowangitfumela kutsi ngite kulendzawo ngitewusindzisa timphilo tebantfu. Faro sewungente ngaba ngumbusi waseGibhithe. Ngako-ke sheshani nitjele babe ngako konkhe lenginitjele kona, nekutsi ete atewuhlala lana eGibhithe.’

Josefa wanga bomnakabo. Faro watsi nakeva kutsi bomnakabo Josefa befikile, watsi kuye: ‘Ababophele imitfwalo yabo balandze babe wabo kanye nemndeni wakubo bete lapha. Ngitawubanika indzawo lenhle kakhulu lapha eGibhithe.’

Benta njengoba batjeliwe. Lana kulesitfombe uyambona Josefa uhlangabeta babe wakhe ngalesikhatsi efika nemndeni wakhe eGibhithe.

Umndeni waJakobe wawumkhulu kakhulu. Sewuwonkhe bewunebantfu labangu-70 ngalesikhatsi utfutsela eGibhithe, nasibala Jakobe, bantfwana bakhe kanye nebatukulu. Kwakukhona nebafati bemadvodzana akhe, kanye netisebenti takhe letinyenti. Bonkhe bafika bahlala eGibhithe. Bebabitwa ngekutsi ngema-Israyeli, ngobe Nkulunkulu abelishintjile ligama laJakobe watsi ngu-Israyeli. Aba sive lesikhetseke kakhulu kuNkulunkulu. Njengoba sichubeka, sitawufundza lokunyenti ngawo.