Mwaha 25: Etthoko Enithaamela Wejiitu
YOSEFE khonwerya-tho wiihiiha. Owo onnaaleela arumeyi awe otheene wira akhumee mukwaartu. Vaavo owo varya awe ekhawe ni annawe, Yosefe onnipacerya wunla. Nnoowerya wuupuwela moota annawe sinikhala aya ootikinihiwa, okhala wira khanisuwela mwaha aya owo vaninla awe. Wanikisa waya owo onii: ‘Miyo ka Yosefe. Tiithi aka nlelo mukumii?’
Annawe anikhala ootikinihiwexa vahinwerya aya olavula. Awo arii oowoova. Masi Yosefe onii: ‘Xontte mukaattamele.’ Vaavo vanimwaattamela aya, owo onii: ‘Miyo ka Yosefe munninyu, yoole mwaamutuminha anyu khuruuhiwaka elapo ela ya wEjiitu.’
Yosefe onnivikaniha olavula mmukhalelo wooreera murima: ‘Muhiivahe nthowa mekhinyuru mwaha woowi mwaahikitumiherya nno. Mwekeekhai Muluku aakiruminhe wEjiitu wira kivuluxe ikumi sa atthu. Farawoo ookipaka okhala namalamulela a elapo yotheene. Siiso vano muhokolowee mowaakuveya wa tiithi aka ni mmuleele ela. Nto mmuleele owo wira orwee ni okhaleke nno.’
Nuumala vo Yosefe aahiwuupaarela annawe, nto aakhupaarela ni waabexari otheene aya. Vaavo Farawoo vaniiwa awe wira ahoorwa annawe Yosefe, owo onnimuleela Yosefe: ‘Mwaahiye akuxe mikukutta ni arowee omukuxa tiithi aya ni itthoko saya sotheene ni ahokolowele nno. Miyo kinrowa waavaha nipuro nooreerexa na wEjiitu wotheene.’
Ela ti etthu eniira aya. Nyuwo pooti omoona va Yosefe okumanaka ni tiithi awe vaavo vaniphiya awe wEjiitu ni etthoko awe yotheene.
Etthoko ya Yakobe yaahaatta vanceene. Otheene aya yaari 70 vaavo awo yaathaamenlya aya wEjiitu, omuhela muhina Yakobe ni an’awe ni axisulwaawe. Masi yaahikhala-tho axaaraya, ni waaniheryasa arumeyi-tho anceene. Otheene ala yaahimaka wEjiitu. Awo yiihaniwa anaIsarayeli, okhala wira Muluku aahittharuxa nsina na Yakobe nikhala Isarayeli. AnaIsarayeli yaahikhala atthu a vameekh’aya vanceene wa Muluku, ntoko ninrowa ahu woona muhoolo.
Maphattuwelo 45:1-28; 46:1-27.
Makoho
- Exeeni eniiraneya vaavo Yosefe vanaaleela awe annawe wira owo panii?
- Exeeni Yosefe enaatthokiherya awe mooreerela murima annawe?
- Farawoo onihimya exeeni vaavo vaniiwa awe sa annawe Yosefe?
- Yaari atthu akavii mu etthoko ya Yakobe vaavo vaathaamaly’aya arowaka wEjiitu?
- Wanikisa waya etthoko ya Yakobe yiitthaniwa sai, ni nthowa xeeni?
Makoho oowuncererya
- Musome Maphattuwelo 45:1-28.
Enooniherya sai ele enihimya Biibiliya sa Yosefe wi Yehova onoowerya orukunuxa ele eniphavela waavulaliha arummwa awe orowa okhumelela etthu yooloka? (Maph 45:5-8; Yes 8:10; aFil 1:12-14)
- Musome Maphattuwelo 46:1-27.
Yoolipiherya xeeni Yehova yanvanha awe Yakobe mmukwaha awe woorowa wEjiitu? (Maph 46:1-4)
