DIRI na naiilob ni Jose an iya emosyon. Ginpagawas niya an ngatanan nga surugoon. Han usa na la hiya upod an iya kabugtoan, nagtangis hiya. Mahuhunahuna naton nga nahipausa gud an iya kabugtoan tungod kay diri hira maaram kon kay ano nga nagtatangis hiya. Katapos, hiya nagsiring: ‘Ako hi Jose, buhi pa ba hi tatay?’

Nahipausa gud an iya kabugtoan salit waray hira makayakan. Nahadlok hira. Kondi hi Jose nagsiring: ‘Daop kamo ha akon.’ Han dinaop hira, hiya nagsiring: ‘Ako hi Jose nga iyo bugto, nga iyo iginbaligya ha Ehipto.’

Padayon nga nagyakan hi Jose ha malumo nga paagi: ‘Ayaw pagbasola an iyo kalugaringon nga iyo ako iginbaligya nganhi. An Dios an nagpadara ha akon nganhi ha Ehipto basi matalwas an mga tawo. Ginhimo ako ni Paraon nga magmarando han bug-os nga nasud. Salit, pagdagmit kamo ngadto kan tatay ngan sumati hiya mahitungod hini. Sidnga hiya nga kumanhi ngan dinhi na umukoy.’

Katapos, ginhangkopan ngan ginhadkan ni Jose an iya kabugtoan. Han hinbaroan ni Paraon nga inabot an kabugtoan ni Jose, hiya nagsiring kan Jose: ‘Ipagamit ha ira an mga karomata ngan paulia hira basi kuhaon an ira tatay ngan an ira mga pamilya ngan pakanhia hira. Ihahatag ko ha ira an pinakamaopay nga tuna ha bug-os nga Ehipto.’

Ito an ira ginbuhat. Dinhi, makikita mo hi Jose nga gintatapo an iya tatay han inabot ha Ehipto upod an iya bug-os nga pamilya.

Nagdaku an pamilya ni Jakob. Mga 70 hira ngatanan han binalhin hira ha Ehipto—hi Jakob ngan an iya mga anak ngan mga apo. Kondi upod liwat ha pagbalhin an mga asawa ngan bangin damu nga surugoon. Hira ngatanan nag-ukoy ha Ehipto. Gintawag hira nga mga Israelita tungod kay ginsaliwnan han Dios hin Israel an ngaran ni Jakob. An mga Israelita nagin espesyal gud nga katawohan han Dios, sugad han aton mahibabaroan.