YUSUFU akulepela kusisa ya mumtima mwakwe. Jwalakwe akwasalila ŵamasengo ŵakwe kuti akopoce kaje m’cipindamo. Pasigele ni acakulugwe ŵala, Yusufu akutanda kulila. Agambe kuganisya muŵasimonjele acakulugwewo pangamanyilila cacamtendekasyaga kulila. Pambesi pakwe akwasalila kuti: ‘Une ndili Yusufu. Ana baba ŵangu ali ciŵela?’

Acakulugwe ŵala akusimonga mnope mwati ngakukola cakuŵeceta cilicose. Wakamwile woga. Nambo Yusufu akwasalila kuti: ‘Ambandicile conde.’ Pam’ŵandicile akwasalila kuti: ‘Une ndili mpwawo jula Yusufu juŵamsumisye ku Eguputo.’

Yusufu akwendelecela kuŵeceta mwakulitimalika acitiji: ‘Nambo sambano akajasa mtima kapena kudandawula pakuŵa nditu ali Mlungu juŵandumisye une ku Eguputo kuti akulupusye ŵandu. Falao ambele une ulamusi wakulamulila cilambo cosopeci. Sambano awutuce kwa baba ŵangu akasalile yeleyi. Soni akasalile kuti ayice atameje akuno.’

Kaneko Yusufu akwakumbatila acakulugwewo nikwakomasya wosopewo ni ngomo palijeje. Falao papikene kuti acakulugwe Yusufu ayice, akumsalila Yusufu kuti: ‘Mwape yigeleta kuti ajawule akajigale atati ŵawo ni maŵasa gawo ni akayiceje akuno. Cinape malo gambone mnope m’cilambo cosope ca Eguputo.’

M’yoyo ŵayitesile yeleyi. Paciwulilipa akum’wona Yusufu ali mkucingangana ni atati ŵakwe payice kucilambo ca Eguputo yimpepe ni liŵasa lyawo lyosope.

Liŵasa lya Yakobo lyakusile mnope. Wosope pampepe ŵapali 70 paŵajawulaga ku Eguputo, kuŵalanjila Yakobo, ŵanace, soni yisukulu yakwe. Nambo ŵapalisoni aciŵam’makwawo, nambosoni komboleka ŵamasengo ŵawo ŵajinji. Wosopeŵa ŵatamaga mu Eguputo. Jemanjaji ŵakolanjikwaga kuŵa Ayisalayeli, ligongo Mlungu ŵamsindile lina Yakobo kuŵa Yisalayeli. Ayisalayeli ŵaliji ŵandu ŵakusosekwa mnope kwa Mlungu, mpela yacituyiwone m’bujo muno.