ANƐ nyumu hiɔtsɛ nɛ ɔ ní pee mo mɔbɔ lo? A tsɛɛ lɛ Hiob, nɛ e yo ji yo ɔ nɛ ngɛ e kasa nya a nɛ. Anɛ o le nɔ́ nɛ e ngɛ Hiob dee lo? E de lɛ ke: ‘Moo gbiɛ Mawu nɛ o gbo.’ Ha nɛ waa hyɛ nɔ́ nɛ ha e de ja, kɛ nɔ́ heje nɛ Hiob hu na nɔ́ wawɛɛ ɔ.

Hiob ji anɔkualetsɛ nɛ́ buu Yehowa tue. E hi he ko ngɛ Kanaan kasa nya, nɛ a tsɛɛ lejɛ ɔ ke Uz. Yehowa suɔ Hiob saminya, se nɔ ko ngɛ nɛ sume Hiob. Anɛ o le jamɛ a nɔ ɔ lo?

Lɛ ji Satan Abosiami. Mo kai kaa Satan ji bɔfo yayami nɛ nyɛɔ Yehowa. E nyɛ nɛ e ha Adam kɛ Hawa gbo Yehowa tue, nɛ e susu kaa e ma nyɛ ma ha nɔ tsuaa nɔ hu nɛ́ gbo Yehowa tue. Anɛ e nyɛ nɛ e pee ja lo? Dɛbi. Mo susu nyumuhi kɛ yihi anɔkuafohi babauu nɛ wa kase a he ní ɔ he nɛ o hyɛ. A kpɛti nihi enyɛmɛ a biɛ o le?

Benɛ Yakob kɛ Yosef gbo ngɛ Mizraim se ɔ, Hiob ji nɔmlɔ nɛ ye anɔkuale kɛ pi si ha Yehowa ngɛ zugba a nɔ tsuo. Yehowa suɔ kaa Satan nɛ le kaa e be nyɛe ma ha nɛ́ nɔ tsuaa nɔ nɛ́ pee nɔmlɔ yayami. Lɔɔ he ɔ, Yehowa de Satan ke: ‘Moo hyɛ Hiob. Hyɛ bɔnɛ e yeɔ mi anɔkuale ha.’

Satan de ke: ‘E yeɔ mo anɔkuale ejakaa o jɔɔ lɛ nɛ e ngɛ ní kpakpahi fuu. Se ke o ngɔ ní ɔmɛ tsuo kɛ je e dɛ ɔ, e maa gbiɛ mo.’

Lɔɔ he ɔ, Yehowa de lɛ ke: ‘Yaa. Ngɔɔ ní ɔmɛ tsuo kɛ je e dɛ. Moo pee Hiob ní yayamihi tsuo nɛ o suɔ kaa o maa pee lɛ. Kɛkɛ wa maa hyɛ kaa e maa gbiɛ mi loo e be mi gbiɛe. Se o hyɛ nɛ e hi konɛ o ko gbe lɛ.’

Nɔ́ kekle nɛ Satan pee ji, e ha nihi ya ju Hiob nahi kɛ afukpɔngɔhi tsuo, nɛ a gbe e jijɔ ɔmɛ hulɔ. Lɔɔ se ɔ, e ha kɔɔhiɔ nɛ nya wa gbe Hiob binyumuhi kɛ biyihi 10 amɛ. Jehanɛ, e ha hiɔ ko nɛ yee nɔ wawɛɛ ba nu Hiob. Hiob na nɔ́ wawɛɛ nitsɛ. Enɛ ɔ heje nɛ e yo ɔ de lɛ ke: ‘Moo gbiɛ Mawu nɛ o gbo’ ɔ nɛ. Se Hiob pee we ja. Kɛ piɛɛ he hu ɔ, e huɛmɛ etɛ ba e ngɔ nɛ a ba de lɛ ke e bɛ e je mi saminya, heje nɛ haomi ɔmɛ ba e nɔ ngɛ ɔ nɛ. Se Hiob hɛɛ e we anɔkuale yemi ɔ mi kɛ ya su nyagbe.

Enɛ ɔ ha Yehowa bua jɔ, nɛ pee se ɔ, e jɔɔ Hiob kaa bɔnɛ wa na ngɛ foni ɔ mi ɔ. E tsa Hiob. Nɛ Hiob ba fɔ bimɛ nɛ a he ngɛ fɛu 10, nɛ e ba ná nahi, jijɔhi kɛ afukpɔngɔhi nɛ́ bɔ he enyɔ kaa bɔnɛ e hi sa a.

Anɛ mo hu o maa ye anɔkuale ha Yehowa daa kaa Hiob lo? Ke o pee ja a, Mawu maa jɔɔ mo. Nɛ benɛ a maa pee zugba nɛ ɔ fɛu kaa Eden abɔɔ ɔ, o maa hi si ngɛ nɔ kɛ ya neneene.