¿JANIT aka usut jaqit sinttʼaskta? Job satawa, uka warmix warmipawa. ¿Kamsaskpachas uk yattati? ‘Diosar ñanqhachasin jiwxam’ saskiwa. Kunatsa ukham saskpacha, ukat kunatsa Job tatax ukham wal tʼaqhispacha uk yatxatañäni.

Job tatax Jehová Diosarux istʼapunirïnwa. Canaanat Uz uraqix janiw sinti jayäkänti, ukan jakasïna. Jehová Diosax Job tatar wal munasïna, ukampis mä uñisiripaw utjäna. ¿Khitis uñispachäna uk yattati?

Supay Satanasawa. Amtañäni, jupax Jehová Diosar uñisir ñanqha angelawa. Jupaw Adanarus Evarus Diosar jan istʼayas jithiqtayänxa, ukat taqinis jithiqtapxaspaw sarakïnwa. ¿Ukhamäspati? Janiwa. Diosar yupaychirinakat yatiqktan uk amtañäni, jupanakax janiw jithiqtapkänti. ¿Qhawqhanirus sutit aytasma?

Jacobus Joseyas Egipton jiwxapxäna, uka qhipatxa Job tataw Jehová Diosar chiqa chuymampi yupaychirïnxa aka Uraqin khitit sipansa. Supayax janiw taqi jaqinakar ñanqhaptaykaspati, ukwa Jehová Diosax Supayar uñachtʼayañ munäna, ukatwa akham säna: ‘Job tatar uñjtati. Jupax chiqa chuymampiw yupaychitu’ sasa.

‘Jumax bendista, sumanak churta ukatwa yupaychtamxa. Bendicionam apaqätaxa, ñanqhachätamwa’ sänwa Supayaxa.

Ukatwa Diosax säna: ‘Walikiwa. Apaqma. Kuna jan walinaktï Job tatar lurañ munkta uk luram ukanwa ñanqhachitanit janich uk uñjañäni. Ukampis janiw jiwayätati, ukatarak jiwayaskasma’ sasa.

Nayraqatxa, Supayax jaqinakampiw vacanakapa camellonakapa lunthatsuyäna, uwijanakapsa jiwarayäna. Mä jachʼa thayampiw tunkpach wawanakapar jiwarayäna. Ukxaruwa Job tatar akham usüntayäna, wal tʼaqhisïna. Ukatwa warmipax ‘Diosar ñanqhachasin jiwxam’ sänxa. Ukampis janiw Job tatax Diosar ñanqhachañ munkänti. Ukat kimsa uñtʼatanakapaw sartʼapxäna, jan wali sarnaqatamatwa ukhaman uñjasta sasaw sapxäna. Ukhampachas Job tatax Diosar yupaychaskakïnwa.

Ukax Jehová Diosar wal kusisiyäna, ukatwa, wal bendicïna, kunjamtï akan uñjaski ukhama. Usupatsa qullänwa, Job tatax yaqha 10 suma uñnaqtʼan wawanakanïnwa, vacapas mä ukhat mä ukhäxänwa, uwijanakapas camellonakapas ukhamaraki.

¿Jobjamti Diosar yupaychaskakïta? Ukham yupaychätaxa, Diosax bendicïtamwa. Aka Uraqix Edén suma huertjamäxani ukhaxa wiñayatakiw jumax jakasisma.