Maana 26nan

Job ye kantigi ye ala fan fɛ

NIN banabagatɔ hinɛ t’i la wa? A tɔgɔ ye ko Job. Muso min jɔlen bɛ k’i ɲɛsin a ma, o ye a muso ye. I b’a dɔn a muso bɛ ka min fɔ a ye wa? Muso ko: ‘I ka Ala danga ka sa.’ Mun na muso sɔnna ka o kuma sugu fɔ? Mun na Job bɛ ka tɔɔrɔ nin cogo la? An k’o lajɛ ɲɔgɔn fɛ.

Job ye cɛ kantigi ye min tun bɛ Jehova ka kuma mɛn tuma bɛɛ. A tun sigilen bɛ Uz jamana na. Uz yɔrɔ tun man jan Kanan la. Jehova tun bɛ Job fɛ kosɛbɛ. Nka, mɔgɔ dɔ wɛrɛ tun bɛ yen min bɛ Job koniya kosɛbɛ. I b’a dɔn o tun ye jɔni ye wa?

O tun ye Sitanɛ-Sendonbaga ye. I kana ɲinɛ ko Sitanɛ ye mɛlɛkɛjugu ye min bɛ Jehova koniya. A sera ka Hadama ni Hawa bila u k’u ban Jehova ka kuma ma. A hakili la, a bɛ se k’a kɛ mɔgɔ tɔw bɛɛ fana ka ban Jehova ka kuma ma. Yala a sera k’o kɛ wa? Ayi. An y’a kalan ka tɛmɛ ko cɛ caman ni muso caman kɛra kantigiw ye Ala fan fɛ. I hakili bɛ olu la wa? I bɛ se ka o mɔgɔ joli tɔgɔ fɔ?

Yakuba ni Yusufu salen kɔfɛ Misira jamana na, Job de tun ye kantigi ye ka tɛmɛ mɔgɔ tɔw bɛɛ kan dugukolo kan. Jehova tun b’a fɛ Sitanɛ k’a dɔn ko a tɛ se ka mɔgɔ bɛɛ kɛ mɔgɔjuguw ye. O la sa, Ala ko Sitanɛ ma: ‘E ka Job lajɛ! E k’a filɛ, a ye kantigi ye ne fan fɛ cogo min na!’

Nka, Sitanɛ ye Ala jaabi ko: ‘A ye kantigi ye bawo i ye dugawu kɛ a ye. Fɛn ɲuman caman fana b’a bolo. Nka, ni i ye o fɛnw bɔ a bolo dɔrɔn, a bɛna i danga.’

O la sa, Jehova ko: ‘Taa. I ka a ka fɛn bɛɛ bɔ a bolo. I b’a fɛ ka kojugu  o kojugu kɛ a la, i k’o kɛ a la. An bɛna a ye ni a bɛna ne danga. Nka, i kɔni kana a faga dɔrɔn.’

Sitanɛ fɔlɔla ka nsonw bila u ka taa Job ka misiw, a ka faliw ni a ka ɲaamɛw sonya ani ka a ka sagaw faga. Sitanɛ tilala ka fiɲɛba dɔ lawuli ka Job den 10 faga, cɛmanw ni musomanw. O kɔfɛ, Sitanɛ ye nin banajugu bila Job la. Job tɔɔrɔla kosɛbɛ. O kosɔn, a muso ko: ‘i ka Ala danga ka sa.’ Nka, Job ma sɔn k’o kɛ. O kɔfɛ tuguni Job terijugu saba nana, ka Job jalaki ko a ye jurumuw de kɛ dogo la, ko olu de kosɔn a bɛ ka tɔɔrɔ. Nka, o bɛɛ la, Job tora a ka kantigiya la.

O diyara Jehova ye kosɛbɛ. O kɔfɛ, Jehova ye dugawu caman lase Job ma, i ko a jiralen bɛ cogo min na ja kan. Jehova ye Job kɛnɛya. Job ye den 10 wɛrɛw sɔrɔ minnu tun cɛ ka ɲi kosɛbɛ. Job ye misiw, faliw, sagaw ni ɲaamɛ caman fana sɔrɔ. A ka baganw cayara ni fɔlɔ ye siɲɛ fila.

Yala e fana bɛna kɛ tuma bɛɛ kantigi ye Jehova fan fɛ i ko Job wa? Ni i kɛra kantigi ye Ala fan fɛ, a bɛna dugawu lase i fana ma. Dugukolo kuuru bɛɛ bɛna cɛɲɛ tuma min na ka kɛ i n’a fɔ Edɛn nakɔ, i bɛna se ka ɲɛnamaya kɛ fo abada a kan.

Job 1:​1-22; 2:​1-13; 42:​10-17.