YENA uli ni keke hali lunga yono unayiza? Jina lienyi Yombi, nawa pwo yono kali mukwo-pwo. Unanyingika yize iye anambe kuli Yombi? Kanambe ngwo: ‘Tuka Zambi hanga ufwe kwe.’ Tutalenu mumu liaka iye anambe chocho, nawa mumu liaka Yombi anamono chize lamba.

Yombi te mutu mukwa ufulielo iye te kakwononokena Yehova. Iye te katwama mu chifuchi cha Uze hakamwihi ni Kanana. Yehova te kakuzanga chinji Yombi, mba alioze te kuli umwe yoze te wakumuvwila kole. Yena unanyingika iya?

Te Satana Ndiapu. Euluka ngwo Satana kali mungelo mupi yoze wakuvwila Yehova kole. Iye mwe unakapiangula Alama ni Eva hanga ehuke kuli Yehova, nawa iye kakunyonga ngwo mahasa kupiangula atu akwo hanga eche kwononokena kuli Yehova. Shina iye kakuhasa kuchilinga? Ka. Achinyonga hali malunga ni mapwo a ufulielo waze hi twalilongesa kulu. Angahi waze yena muhasa kunyingika majina jo?

Muze Yakomba ni Yosefwe te hafwa kulu mu Engitu, Yombi te mutu mukwa ufulielo unji kuli Yehova hashi heswe. Yehova te kanazange hanga Satana anyingike ngwo iye kechi kuhasa kupwisa atu eswe api, kashika iye yamba ngwenyi: ‘Tala Yombi. Tala chize ali ni ufulielo kuli yami.’

Satana yakumbulula ngwenyi, ‘Iye kali mukwa ufulielo, mumu yena hi wamuwahisa nawa iye kali ni yuma yinji yipema. Alioze nyi yena wamuchiza yuma yeswe, iye makutuka.’

Yehova yamba ngwenyi: ‘Chilinge. Muchize yuma yeswe. Linga yuma yipi yeswe yize yena unazange hali Yombi. Mututala nyi iye mangutuka. Mba alioze kanda umushaha.’

Chitangu, Satana yatuma atu hanga eye ngombe ni tumelu ja Yombi, nawa ni mapanga jenyi noo yaashaha. Nawa yamushaha 10 lia ana amalunga ni amapwo ha ola yimuwika. Kulutwe lia yuma yacho, Satana yahana kuli Yombi yikola yino yipi. Yombi yamona lamba linji. Kashika mukwo-pwo anakamba ngwenyi: ‘Tuka Zambi hanga ufwe kwe.’ Mba alioze Yombi yalituna kuchilinga. Yikwiza nawa masepa amahuza atatu, yamwamba ngwo iye kanakapwa ni kulinga yuma yipi. Alioze Yombi kanakanunga mu ufulielo.

Chino chinakaneha chiseke kuli Yehova, kashika kulutwe iye yawahisa Yombi, ngwe chize muhasa kumona ha chizulie chino. Iye yamuchiza yikola yeswe. Yombi yasema nawa ana 10 apema chinji, nawa yapwa ni ngombe, mapanga ni tumelu anji chinji kuhianyisa atangu.

Shina yena mununga ni kufuliela kuli Yehova ngwe Yombi? Nyi wachilinga, ni yena Zambi makakuwahisa. Yena mukahasa kutwama ni mwono wa miaka yeswe, muze hashi muhakapwa hapema ngwe munda wa Endene.