O LOMANA beka na tamata tauvimate oqo? Na yacana o Jope, na yalewa oqori e watina. O kila na ka e kaya tiko vei Jope? ‘Vosavakacacataka na Kalou mo mate.’ Meda raica mada se cava e kaya kina na vosa oya, kei na vuna e sotava kina o Jope na bula dredre.

E tamata yalodina o Jope qai dau talairawarawa vei Jiova. E tiko ena vanua o Usi, volekati Kenani. E taleitaki Jope vakalevu o Jiova, ia e dua e dau sevaki koya. O kila beka se o cei?

Oqori o Setani na Tevoro. Nanuma tiko ni o koya na agilosi ca e cati Jiova. A vakavuna nodrau talaidredre o Atama kei Ivi, qai nanuma ni rawa ni cakava vei ira na tamata kece. Ia, a rawata beka? Sega. Vakasamataka mada na levu ni tagane kei na yalewa yalodina eda sa vulica oti mai. O cei so o nanuma rawa?

Ni rau sa mate o Jekope kei Josefa mai Ijipita, sa qai mai tamata yalodina tiko yani ena vuravura taucoko o Jope. A vinakata o Jiova me kila o Setani ni na sega ni rawai ira kece na tamata mera talaidredre, sa qai kaya: ‘Raici Jope mada e yalodina tiko ga vei au.’

E kaya o Setani: ‘E yalodina ga baleta ni o vakalougatataki koya tiko me levu kina na nona iyau, ia kauta tani mada ena qai vosavakacacataki iko.’

A qai kaya o Jiova: ‘Kauta tani kece mai vua qai vakararawataki koya. Sa na qai macala e na vosavakacacataki au se sega. Kua ga ni vakamatei koya.’

Na imatai ni ka a cakava o Setani vei Jope oya ni a vakavuna me butakoci na nona bulumakau kei na nona kameli, ra qai vakamatei na nona sipi. E vakamatei iratou na 10 na luvena ena cagilaba. Oti, sa qai tauvi Jope e dua na mate rerevaki. E rarawa vakalevu o Jope. Oqori sara ga na vuna a kaya kina na watina: ‘Vosavakacacataka na Kalou mo mate.’ Ia e sega ni vakarorogo vua o Jope. Sa ratou qai lako mai e tolu na nona itokani lasulasu, eratou kaya ni tamata ivalavala ca. Ia e yalodina tiko ga vua na Kalou o Jope.

E vakamarautaki Jiova na yalodina i Jope, e qai vakalougatataki koya vakalevu me vaka ga o raica tiko ena iyaloyalo oqori. E vakabulai koya mai na tauvimate. E 10 tale na luvena rairai vinaka, qai vakaruataki na iwiliwili ni nona bulumakau, sipi, kei na kameli.

Kevaka o dau yalodina tiko ga vei Jiova me vakataki Jope ena vakalougatataki iko tale ga o Jiova. O na rawa ni bula tawamudu ena gauna sa na caka kina na vuravura taucoko me rairai vinaka me vaka sara ga na were o Iteni.