¿MOJUSÜ paaʼin naalii chi ayuuishikai? Job nünülia otta nuʼwayuuse tü jietkat. ¿Pütüjaa aaʼu jamüsü sünüiki nümüin? ‹Moju pünüiki nümüin Maleiwa jee oukta mata pia›, müsü nümüin. Wekirajaa jamüsü maka sünüiki otta jamüshi müliaka maʼin Job.

Oonooshi Job waneepia nümüin Jeʼwaa. Kepiashi nia Uz, süʼütpaʼa Canaán. Aishi maʼin Job nüpüla Jeʼwaa, nüʼürülashi nia wanee aapiee. ¿Pütüjaa aaʼu jarai nia?

Nia Satanás chi Yolujaakai. Soto paaʼin mojulaain nia jee nüʼürülain Jeʼwaa. Nnojoishi oonooin Adán otta Eva nümüin Jeʼwaa nutuma otta meeshii na wayuukana nutuma. ¿Naainjüin tia? Nnojo, soto paaʼin na wayuu oonookana nümüin Maleiwa wekirajaaka anain. ¿Sotusü paaʼin nanülia?

Süchikijee ouktuin Jacob otta José, nia Job oonooka maʼin nümüin Jeʼwaa Mmapaʼa. Niiʼiyateein Jeʼwaa isain nüchiki Satanás mojulaain nutuma napüshuaʼa na wayuukana, nümaka nümüin: ‹Piirakaa nümüin Job, oonooshi waneepia tamüin›.

Nümaka Satanás: ‹Oonooshi nia waneepia pümüin süka anain nukuwaʼipa putuma, wainma kasa nümaʼana, püsütüle shia nuulia mojeerü nünüiki pümüin›.

Nümaka Jeʼwaa nümüin: ‹Püsüta shia nuulia. Paainja kasa mojusü nümüin. Watüjaajeetka saaʼu mojeerüle nünüiki tamüin, akaisaʼa nia nnojo puʼutuin naaʼin›.

Palajana, nuʼluwajirüin Satanás nümülüin Job, nuʼuta aaʼinrü 10 nüchonnii, mapa ayuuika nia nutuma. Müliashi maʼin Job. Sümaka tü nuʼwayuusekat nümüin: ‹Moju pünüiki nümüin Maleiwa jee oukta mata pia›. Nnojotsü naainjeein Job tia. Antüshii nünainmüin 3 wayuu naʼaleewainyaashii, müliashi nia naashin sutuma naainjüin kasa mojusü, akaisaʼa Job oonooshi waneepia nümüin Maleiwa.

Talatüshi maʼin Jeʼwaa sutuma tia, anasü nukuwaʼipa Job nutuma, piirakaa nümüin suluʼu tü ayaakuaakat. Nnojoluichipa ayuulin, 10 süchikuaʼa nüchonnii otta wainmaleʼeya nümülüin.

¿Müsü pukuwaʼipa mayaa? Müle shia aneerü pukuwaʼipa nutuma Maleiwa. Kateerü poʼu waneepia saaʼu tü Mmakat paraiisüpa shia.