Job wa ri omuṱakame ku Mukuru
EHUNGI 26
Job wa ri omuṱakame ku Mukuru
OMURUMENDU ngwi ngwa vera ove mo mu ṱire ondjenda? Ena re oJob, nu ingwi omukazendu we. Ove mo tjiwa kutja ma tja tjike ku Job? ‘Senga Mukuru uriri u ṱokukoka.’ Ngatu tare kutja ongwaye tja tjere nao, nu omena ratjike Job tja mwine ouzeu tjinene nao.
Job wa ri omurumendu omuṱakame ngwa ri nonḓuviro ku Jehova. Eye wa turire mehi raUs popezu na Kanaan. Jehova wa suverere Job tjinene, nungwari pa ri umwe ngwe mu tondere tjinene. Ove mo tjiwa kutja owaṋi?
Eye wa ri Satana Omudiaboli. Zemburuka kutja Satana omuengeli omuvi ngwa tonda Jehova. Eye wa yenena okutjita ooAdam na Eva kutja ave ha puratene ku Jehova, okutja eye we ripura kutja ma yenene okutjita kutja kangamwa omundu a ha puratene ku Jehova wina. Nu eye wa yenena po? Kako. Ripura uriri novarumendu novakazendu ovaṱakame ovengi mbu twe rihonga. Ivengapi mbu mo yenene okutamuna?
Kombunda yaindu Jakob na Josef tji va koka moEngipte, Job ongwa ri omurumendu omuṱakame tjinene ku Jehova mehi arihe. Jehova wa vangere okutjivisa Satana kutja kamaa yenene okutjita kutja ovandu avehe ve rire ovavi, okutja eye wa tjere: ‘Tara ku Job. Ove mo munu kutja eye omuṱakame vi ku ami?’
Satana wa pataṋa a tja: ‘Eye omuṱakame kove mena rokutja u mu sera ondaya nu u na oviṋa ovingi oviwa. Nungwari tji we mu yeka oviṋa mbi, eye me ku sengi.’
Okutja Jehova a tja: ‘Osemba. Mu yeka avihe. Tjita ouvi auhe mbu mo vanga ku Job. Matu tara kutja me ndji sengi. Tjita kutja o he mu zepa uriri.’
Rutenga, Satana wa tjita kutja ovarumendu ve vake ozongombe nozongamero zaJob nave zepa ozonḓu ze. Okuzambo eye wa zepa ovanatje ve ovazandu novakazona 10 notjivepo. Okuzambo Satana wa wira Job nomutjise omuzeu. Job wa munine ouzeu tjinene. Omukazendu waJob opa zokuraera Job kutja: ‘Senga Mukuru u ṱokukoka.’ Nungwari Job kena pe tji tjita. Opo wina pe ere omapanga woposyo yetatu ave mu raera kutja aa tjiti ouvi opu ma zu okumuna ouzeu. Nungwari Job wa kakatera kouṱakame.
Ihi tja nyandisa Jehova omutima tjinene, okuzambo eye wa sera Job ondaya otja tji mo munu motjiperendero. Eye we mu verura komutjise. Job wa ri novanatje varwe 10 ovawa, nozongombe nozonḓu nozongamero ozengi potuvari okukapita inḓa nḓa ri na zo.
Ove mo kara omuṱakame aruhe ku Jehova tjimuna Job? Tji wa tjiti nao, Jehova me ku sere ondaya wina. Ove mo yenene okuhupa nga aruhe indu ehi arihe tji mari ka tjitwa ewa tjimuna otjikunino tjaEden.
