Yub yeṭṭef di Ṛebbi
TAQSIṬ TIS 26
Yub yeṭṭef di Ṛebbi
IƔAḌ-IK umeɣbun-agi yuḍnen? Isem-is Yub. Tagi ibedden ɣer tama-s ţ-ţameṭṭut-is. Teẓriḍ acu i teqqar i Yub? Teqqar-as: ‘Nɛel Ṛebbi temmteḍ.’ Ayɣer i tehdeṛ akka i wergaz-is, yerna acu yessawḍen Yub ɣer yir liḥala-ya?
Yub yella d unṣiḥ yeţţaɣen awal i Yahwa. Iɛac di tmurt n Uz, yiwen wemḍiq ur nebɛid ara ɣef Kanɛan. Yahwa iḥemmel aṭas Yub, lameɛna yella yiwen i t-ikeṛhen. Teẓriḍ anwa-t?
D Cciṭan Iblis. Tecfiḍ fell-as? Cciṭan d lmelk-nni n diri ikeṛhen Yahwa. Imi yessaweḍ Adam d Ḥewwa ad ɛaṣin Ṛebbi, iɣil yezmer ad yawi medden meṛṛa deg yir abrid. Iwweḍ ɣer lebɣi-s? Xatị. Xemmem ɣer yergazen ţ-ţlawin meṛṛa unṣiḥen i nwala di teqsiḍin iɛeddan. Acḥal n yismawen i tzemreḍ a d-tḥesbeḍ?
Mbeɛd lmut n Yeɛqub d Yusef di Maṣer, ulac win yeṭṭfen di Ṛebbi am Yub di lqaɛa meṛṛa. Yahwa yebɣa ad issken i Cciṭan belli ur yezmir ara ad issefsed imdanen akken ma llan. Yahwa yenna-yas: ‘Muqel Yub acḥal yella d unṣiḥ.’
Cciṭan yerra-yas i Ṛebbi: ‘D unṣiḥ i gella axaṭer tesseṛwaḍ-as lbaṛakat d lerẓaq. Lameɛna, ma tekkseḍ-as ayen akk yesɛa, a k-inɛel.’
Ihi Yahwa yenna-yas: ‘Yirbeḥ! Kkes-as lerẓaq meṛṛa yesɛa. Xdem-as akk ayen i k-ihwan. Imiren a nwali m’ad iyi-nɛel neɣ ala. Lameɛna, ɣur-ek a t-tenɣeḍ.’
Di tazwara, Cciṭan idemmer kra n yergazen ad akren lmal ameqran d ileɣman n Yub. Yenɣa-yas daɣen lmal-is amecṭuḥ. Umbeɛd, Cciṭan inɣa-yas ɛecṛa n warraw-is s tbuciḍant. Ɣer taggara, yefka-yas yiwen lehlak iṣeɛben nezzeh. Yub yetmeḥḥen aṭas mačči d cwiṭ. Ɣef waya i s-tenna tmeṭṭut-is: ‘Nɛel Ṛebbi temmteḍ.’ Lameɛna, Yub yugi ad ixdem lḥaǧa yecban tagi. Usan-d ɣur-es daɣen tlata yergazen yellan zzeɛma d iḥbiben-is, nnan-as belli ur yetbiɛ ara abrid n lewqam. Ɣas akka, Yub iqqim d unṣiḥ.
Ayagi yessefṛeḥ aṭas Yahwa, daymi i gburek Yub akken i teţwaliḍ di ţţeswiṛa-ya. Isseḥla-t seg waṭan-is icemten. Yub yesɛa-d ɛecṛa igurdan nniḍen izeynen s waṭas. Ṛebbi yefka-yas i Yub sin imuren ɣef wayen akk yesɛa zik, ama d lmal ameqran, ama d lmal amecṭuḥ, ama d ileɣman.
Aţ-ţiliḍ ṭṭul n leɛmeṛ-ik d unṣiḥ i Yahwa am Yub? Ma telliḍ d unṣiḥ aţ-ţeţţubarkeḍ am neţţa. Aţ-ţizmireḍ aţ-ţɛiceḍ i lebda ɣef lqaɛa asm’ara tuɣal d lǧennet yecban tin n Ɛidin.
