NDAI machyi hkrum ai masha wa hpe matsan ndum a ni? Shi amying gaw Yoba re. Ndai num gaw shi a madu jan rai nga ai. Yoba hpe shi hpa tsun nga ai hpe chye a ni? ‘Karai Kasang hpe matsa nna si mat nu’, nga ai. Dai daram shi hpa majaw tsun a ni? Bai nna Yoba gaw dai daram hpa majaw nni nkri hkrum a ni? Anhte yu yu ga.

Yoba gaw Yehowa a ntsa hta sadi dung ai hte, madat mara ai masha re. Shi gaw Uza mare hta nga ai. Hkanan mung hte nau ntsan ai. Yehowa gaw Yoba hpe grai tsaw ra ai. Raitimung Yoba hpe nju ndawng ai wa langai mi nga ai. Kadai wa re ai hpe chye a ni?

Satan nat rai nga ai. Satan gaw Yehowa hpe nju ndawng ai n hkru ai lamu kasa langai mi re ai hpe naw myit dum ma ni? Satan gaw Adam hte Ewa Yehowa a ga hpe n madat hkra lu galaw ai. Masha shagu hpe mung Yehowa a ga n madat hkra galaw lu na zawn shi nawn ai. Raitimung kaja wa shi galaw lu a ni?Anhte hti lai wa ai hta sadi dung ai anum, ala ni law law nga ai. Marai kade a amying hpe matsing a ni?

Yaku hte Yosep gaw Egutu mung hta si mat wa ai hpang e, ginding aga ting hta Yoba gaw Yehowa a ntsa e, sadi dung dik ai masha langai mi tai wa ai. Masha shagu hpe n kaja hkra Satan n-galaw lu ai, nga nna Satan hpe Yehowa chye shangun mayu ai: ‘Dai majaw Yoba hpe yu u. Shi gaw nye a ntsa hta gade daram sadi dung ai hpe yu u,’ nga nna Satan hpe tsun ai.

‘Satan gaw Yoba sadi dung ai lam teng ai. Nang gaw shi hpe shaman chyeju jaw tawn ai majaw, shi hta sut gan law law lu ai. Dai sut gan ni hpe shi kaw na dawm la kau yu u le. Nang hpe shi nyet kau na ra ai’, nga nna, dang rang ai.

Dai majaw Yehowa gaw: ‘galaw yu u; shi a sut gan yawng hpe la kau u. Yoba hpe nang ra ai daram jam jau jaw u, ngai hpe shi nyet kau na rai kun? Yu yu ga; shi hpe sha hkum sat kau u,’ nga nna tsun ai.

Shawng nnan e, Satan gaw Yoba a sagu ni, dumsu ni, gawla-uk ni masha ni hpe lagu la shangun nna, sagu ni hpe sat kau shangun ai. Bai nna nbung laru hte, shi a shayi shadang sha 10 ni hpe, sat kau ai. Hpang e kalang mi Yoba hpe, hkrit hpa ana hte zingri wu ai. Yoba gaw grai hkam sha yak nga ai. Dai majaw Yoba a madu jan gaw, ‘Karai Kasang hpe matsa nna si mat nu’, nga nna tsun ai. Raitimung Yoba gaw dai zawn n-galaw ai. Bai nna sawt ai jinghku masum shi kaw sa nna, nang gaw shawng de n kaja ai amu hpe galaw ai majaw re, nga ma ai. Raitimung Yoba gaw sadi agrin nga ai.

Ning re ai majaw Yehowa grai myit pyaw ai. Hpang e Yoba hpe shaman chyeju jaw ai. Ndai sumla hta mu ai hta maren, shi machyi ai hpe shamai ya ai. Yoba mung grai tsawm ai kasha 10 bai matut lu la ai. Shawng na hta grau nna, dumsu, sagu hte gawla-uk htam lahkawng bai lu la ai.

Nanhte gaw Yoba zawn, galoi mung Yehowa a ntsa e sadi dung na ma ai kun? Sadi dung ai rai yang nahte hpe mung, Karai Kasang shaman chyeju jaw na re. Mungkan ting Edin sun zawn tsawm htap ai hta, nanhte prat ding sa asak hkrung nga lu na re.