Ngewa ya 26: Yovu Aĩ Mũĩkĩĩku kwa Ngai
WE NŨŨMWĨW’ĨA tei mũndũ ũũ mũwau? Syĩtwa yake nĩ Yovu, nake ũ mũndũ mũka nĩ kĩveti kyake. We nĩwĩsĩ ũndũ kĩũmwĩa? ‘Uma Ngai noikw’a.’ Ekai twone nĩkĩ kyaneenie ũndũ ũilyĩ ũu, na nĩ kyaũ kyatumie Yovu athĩna mũno wĩana ũu.
Yovu aĩ mũndũ mũĩkĩĩku na nĩwamwĩw’aa Yeova. Atũaa nthĩ ya Usi, ĩte vaasa mũno na Kanaani. Yeova nĩwendete Yovu mũno, ĩndĩ ve mũndũ wamũmenete. We nĩwĩsĩ nũũ?
Nĩ Satani ũla Ndevili. Lilikana kana Satani nĩ mũlaĩka mũthũku ũla ũmenete Yeova. Nĩwatumie Atamu na Eva malea kũmwĩw’a Yeova, na asũanĩaa kana no atume andũ ala angĩ onthe malea kũmwĩw’a Yeova o namo. Ĩndĩ nĩwatonyie kwĩka ũu? Aiee. Kwatata kũsũanĩa ĩũlũ wa aũme na aka aingĩ ala tũminĩte kwĩmanyĩsya ũvoo woo. Nĩmeana ũtonya kũweta masyĩtwa moo?
Ĩtina wa Yakovo na Yosevu kũkw’ĩĩa nthĩ ya Misili, Yovu nĩwe mũndũ ũla waĩ mũĩkĩĩku vyũ kwa Yeova ĩũlũ wa nthĩ yonthe. Yeova nĩwendaa kũmanyĩthya Satani kana ndatonya kũtuma kĩla mũndũ atw’ĩka mũthũku, kwoou asya: ‘Kwasisya Yovu. Kwoona ũndũ ũndĩkĩĩe.’
Nake Satani akananĩa ayasya, ‘We akũĩkĩĩaa nũndũ nũmũathimĩte na e na syĩndũ mbingĩ nzeo. Ĩndĩ wavetanga syĩndũ isũ, akakũuma.’
Kwoou Yeova asya: ‘Enda ũkaivetange. Ĩka Yovu maũndũ mathũku onthe ala ũkwenda. Tũkoona kana akanuma. Ĩndĩ ndũkatate kũmũaa.’
Mbee, Satani aetie andũ mooya ng’ombe na ngamĩle sya Yovu, na malondu make mooawa. Na ĩndĩ ooaa ana 10 na eĩtu make na kĩseve kĩnene. Na asyoka amũetee Yovu ũwau ũũ mũthũku. Yovu nĩwathĩnie mũno. Kĩu nĩkyo kyatumie mũka wa Yovu amwĩa: ‘Uma Ngai noikw’a.’ Ĩndĩ Yovu ndaĩ etĩkĩla kwĩka ũu. O na ĩngĩ, anyanyae atatũ ma ũvũngũ mooka na mamwĩa ekalaa mwĩkalĩle mũthũku. Ĩndĩ Yovu ndaaeka kwĩthĩwa e mũĩkĩĩku.
Ũndũ ũsu nĩwatanĩthisye Yeova mũno, na ĩtina wa maũndũ asu amũathima Yovu, o tondũ ũtonya kwona vaa visanĩ. Nĩwamũvoisye ũwau wake. Yovu nĩwakwatie syana ingĩ 10 mbanake. Nasyo ng’ombe, malondu na ngamĩle, akwata kũndũ kwĩlĩ kwa ila waĩ nasyo vau mbee.
We ũkeethĩawa mavinda onthe wĩ mũĩkĩĩku kwa Yeova ta Yovu? Weethĩwa ũilyĩ ũu, Ngai akakũathima o naku. Ũkeethĩwa ũtonya kwĩkala tene na tene yĩla nthĩ yonthe ĩkanakavw’a ta mũũnda wa Eteni.
Yovu 1:1-22; 2:1-13; 42:10-17.
Makũlyo
- Yovu aĩ ũũ?
- Satani atatie kwĩka ata, ĩndĩ nĩwatonyie?
- Yeova anengie Satani mwanya eke ata, na nĩkĩ?
- Nĩkĩ mũka wa Yovu wamwĩie “uma Ngai noikw’a”? (Sisya visa.)
- O tondu ũtonya kwona visanĩ wa kelĩ, Yeova aathimie Yovu ata, na nĩkĩ?
- Ithyĩ tweethĩwa twĩ aĩkĩĩku kwa Yeova ta Yovu, tĩkakwata moathimo maũ?
Makũlyo ma kwongeleela
- Soma Yovu 1:1-22.
Ũmũnthĩ Aklĩsto matonya kwĩyĩelekany’a na Yovu ata? (Yovu 1:1; Avi. 2:15; 2 Vet. 3:14)
- Soma Yovu 2:1-13.
Nĩ nzĩa ilĩ syĩva syĩ kĩvathũkany’o vyũ sya ũndũ Yovu na mũka wake meekie makwatwa nĩ matatwa ma Satani? (Yovu 2:9, 10; Nth. 19:3; Mika 7:7; Mal. 3:14)
- Soma Yovu 42:10-17.
Vena movw’anano maũ katĩ wa mũthĩnzĩo ũla Yovu wakwatie na ũla Yesũ wakwatie nũndũ wa kwĩthĩwa e mũĩkĩĩku ĩvinda ya thayũ wake? (Yovu 42:12; Avi. 2:9-11)
Moathimo ala Yovu wakwatie nũndũ wa kũlũmya wĩanĩu wake kwa Ngai metwongela vinya ata? (Yovu 42:10, 12; Aevl. 6:10; Yak. 1:2-4, 12; 5:11)
