МЫ ЦІЫХУХЪУ сымаджэр пфІэгуэныхь хъукъэ? Ар Іэюбщ, цІыхубзыр абы и фызыращ. ПщІэрэ абы Іэюб жриІэр сытми? «Алыхьым ебги зыгъалІэ». ИІэт, къэтщІэнти абы апхуэдэу щІыжиІэмрэ, Іэюб апхуэдиз гугъуехь щІытелъымрэ.

Іэюб Алыхьым хуэпэж, хуэжыІэдаІуэ цІыхут. Ар Ханаан пэмыжыжьэу Уц щІыналъэм щыпсэут. Иеговэ фІыщэу илъагъут Іэюб, ауэ ар зылъагъу мыхъу гуэри щыІэт. ПщІэрэ хэтми?

ШейтІану Иблисыращ. ПщІэжрэ, Иблисыр Иеговэ зылъагъу мыхъу мелыІыч Іейращ. Абы къехъулІащ Іэдэмрэ Хьауарэ Иеговэ иримыгъэдэІуэн икІи цІыху псори Иеговэ емыдаІуэу хуэщІыну и гугъащ. Ауэ къехъулІа ар абы? Хьэуэ. Уигу къэгъэкІыжыт иджыри къэс зэдгъэцІыхуа цІыхухъу, цІыхубз пэжхэр. Хэт абыхэм щыщу зи цІэ къыпхуэщІэжынур?

Екъубрэ Исуфрэ Мысырым щылІа иужь, псом нэхърэ Иеговэ нэхъ хуэпэжу дунейм тетар Іэюбщ. Иеговэ хуейт ШейтІаным цІыху псори Іей зэрыхуэмыщІынур ищІэжынуи, жриІащ: «Еплъыт Іэюб. Еплъыт ар сэ зэрысхуэпэжым».

— Ар щІыпхуэпэжыр,— жиІащ ШейтІаным,— зыхуейр хубощэІри аращ, ар къулейщ. Ауэ къеІыхыт абы и къулеягъэр, занщІэу къобгынущ.

ИтІанэ Иеговэ жиІащ: «ИІэ-тІэ, еплъ. КъеІых и къулеягъэр. Узыхуейр ещІэ Іэюб. Деплъынти къызэбгрэ къызэмыбгрэ. Ауэ умыгъалІэ».

Япэ щІыкІэ ШейтІаным цІыхухэм яригъэдыгъуащ Іэюб и жэмхэмрэ махъшэхэмрэ, итІанэ и мэлхэр игъэлІащ. ИтІанэ жьышхуэкІэ иукІащ и бынипщІыр, абы иужьыжкІэ Іэюб мис мыпхуэдэ узыфэ Іей къригъэуэлІащ. Іэюб гугъуехь Іей телът. Аращ абы и фызым щІыжиІар: «Алыхьым ебги зыгъалІэ»,— жиІэу. Ауэ Іэюб хуеякъым апхуэдэу ищІэну. Абы иужькІэ и ныбжьэгъу нэпцІищыр къакІуэри ягъакъуэншащ, япэм щыгъуэ абы Іей гуэр ищІауэ жаІэри. Апщыгъуэми Іэюб пэжу къэнащ.

Иеговэ абы Іейуэ щыгуфІыкІащ, икІи, мы сурэтым зэрыщыплъагъущи, иужькІэ фІы куэд хуищІэжащ. Ар игъэхъужащ. Іэюб иджыри бынипщІи игъуэтыжащ. Жэму, мэлу, махъшэу абы иІам нэхърэ тІукІэ нэхъыбэ иІэ хъуащ.

Іэюб сытым дежи Иеговэ зэрыхуэпэжам хуэдэу, ухуэпэжыну уэри? Ухуэпэжу щытмэ, апхуэдэу уэри фІы куэд къыпхуищІэнущ. ЩІылъэ псори Едем жыг хадэм хуэдэ хъужа иужь, уэ игъащІэкІэ абы ущигъэпсэунущ.