WEE-RĨ, nĩ ũraigwĩra mũndũ ũyũ mũrũaru tha? Eetagwo Ayubu, na mũtumia ũyũ nĩ mũka. No ũmenye ũrĩa arera Ayubu? ‘Ruma Ngai uumanie na ũgĩkue.’ Tareke tuone nĩkĩ gĩgũtũma arie ũndũ ta ũcio, na gĩtũmi gĩa kũnyarirĩka kwa Ayubu mũno.

Ayubu aarĩ mũndũ mũthingu wathĩkagĩra Jehova. Aatũraga bũrũri wa Uzu, gũkuhĩ na Kanaani. Jehova nĩendete Ayubu mũno, ĩndĩ nĩ kwarĩ mũndũ ũngĩ wamũthũire. Nĩ ũũĩ nũũ ũcio?

Kaĩ atakĩrĩ Shaitani Mũcukani. Ta ririkana, Shaitani nĩwe mũraika ũrĩa mũũru ũthũire Jehova. Nĩ aahotire gũtũma Adamu na Hawa maremere Jehova, na agĩĩciria atĩ no ahote gũtũma andũ othe o nao maremere Jehova. Ĩ hihi nĩ aahotire? Aca. Tawĩcirie ũhoro wa arũme na atumia aingĩ arĩa athingu twĩrutĩte ũhoro wao. Ũngĩgweta aigana?

Thutha wa Jakubu na Jusufu gũkuĩra Misiri-rĩ, Ayubu nĩwe waarĩ mũndũ mũthingu mũno he Jehova thĩinĩ wa thĩ yothe. Jehova endete Shaitani amenye atĩ ndangĩahotire gũtũma andũ othe matuĩke oru, kwoguo akiuga ũũ: ‘Tarora Ayubu. Kĩone ũrĩa arĩ mũthingu harĩ niĩ.’

‘Ĩĩ nĩ mũthingu,’ Shaitani akiuga, ‘nĩũndũ nĩũmũrathimĩte na arĩ na indo nyingĩ njega. No ũngĩcieheria, no akũrume.’

Jehova akiuga: ‘Thiĩ na mbere. Cieherie. Mwĩke maũndũ mothe moru marĩa ũkwenda. Tũkĩone kana nĩ ekũnuma. Ĩndĩ ũndũ ũtagwĩka-rĩ, ndũkamũrage.’

Mbere, Shaitani agĩtũma andũ maiye ngombe na ngamĩra cia Ayubu, na ng’ondu ciake ikĩũragwo. Agĩcoka akĩrehe rũhuho rũkĩũraga ariũ na aarĩ ake 10. Thutha ũcio, Shaitani akĩgũtha Ayubu na mũrimũ ũyũ mũũru. Ayubu nĩ aanyarirĩkire mũno. Na nĩkĩo mũtumia wa Ayubu aamwĩrire ũũ: ‘Ruma Ngai uumanie na ũgĩkue.’ Ĩndĩ Ayubu ndaigana gwĩka ũguo. O na ningĩ, arata atatũ a ũrambu magĩũka makĩmwĩra nĩ atũũrĩte mũtũũrĩre mũũru. Ayubu aathire na mbere arĩ o mũthingu.

Ũhoro ũyũ nĩ watũmire Jehova akene mũno, na thutha-inĩ akĩrathima Ayubu, o ta ũrĩa ũrona mbica-inĩ ĩno. Agĩkĩmũhonia. Ayubu akĩgĩa na ciana ingĩ 10 thaka, na maita merĩ ma ng’ombe, ng’ondu na ngamĩra gũkĩra ũrĩa aarĩ nacio mbere.

Wee-rĩ, nĩ ũrĩkoragwo ũrĩ mũthingu hingo ciothe he Jehova ta Ayubu? Ngai nĩarĩkũrathima o nawe watuĩka mũthingu. Nĩũgatũũra tene na tene hĩndĩ ĩrĩa thĩ yothe ĩgatuo thaka o ta mũgũnda wa Edeni.