NANCHI wamubila lusa uno mwanamulume wakolwa nyi? Jizhina janji Yoba, ne uno mwanamukazhi ke mukazhanji. Abya wayuka byo abena kwamba kwi Yoba nyi? Ubena kwamba’mba: ‘Munenai Lesa bya mwenga, mufwe.’ Twaya tumone ene mambo o aambijile kintu kya uno mutundu, ne ene mambo Yoba kyo amanamijile kyabaya bingi.

Yoba wajinga muntu wa kishinka wakokejilenga Yehoba. Waikajilenga mu kyalo kya Uze, kwipi na kyalo kya Kenana. Yehoba wamutemenwe bingi Yoba, bino kwajinga muntu umo wamushikilwe. Wamuyuka nyi?

Ke Satana Diabola. Vuluka kuba’mba Satana ke malaika watama washikwa Yehoba. Walengejile ba Adama ne Evwa kusatukila Yehoba, kabiji walangulukile kuba’mba wakonsha ne kulengela bantu bonse kubula kukokela Yehoba. Nanchi wakonsha kuba bino nyi? Ine. Akilanguluka pa banabalume ne banabakazhi bakishinka bo twafundapo kala. Banga bo wakonsha kuvulukapo?

Ba Yakoba ne Yosefwa saka bafwa kala mu Ijipita, Yoba wajinga muntu wa kishinka bingi kwi Yehoba panopantanda ponse. Yehoba wakebelenga Satana kuyuka’mba kechi wakonsha kwalula bantu bonse ke batama ne. Onkao mambo waambile’mba: ‘Wamumona Yoba. Akitala byo angakamwa amiwa.’

Satana waambile’mba: ‘Wimwakamwa mambo mwamupesha bingi kabiji bintu byanji byawama byavula bingi. Pano bino umvwe mwamwangata bino bintu ukemunena mwenga.’

Kepo Yehoba amwambijile’mba: ‘Yanga. Nakupa lūsa lwa pa byonse byo aji nabyo. Kobe kyonse kyatama kyo ukeba kwi Yoba. Tumone umvwe ukanena amiwa mwenga. Aye mwine kange ukamwipaye ne.’

Kitanshi, Satana walengejile banabalume kwiba bañombe ne bangamela ba kwa Yoba, kabiji baipayile ne mikooko yanji. Kepo alengejile mwela mukatampe kwipaya baana banji jikumi babalume ne babakazhi. Kya bubiji, Satana wamulengejile Yoba kukolwa kikola kyatama bingi. Yoba wamanamine bingi. Kyo kine kintu muka Yoba kyo amwambijile’mba: ‘Munenai Lesa bya mwenga, mufwe.’ Bino Yoba kechi wanenañene ne. Kabiji balunda nanji babubela basatu baishile ko aji ne kumwambila’mba kechi wajinga na byubilo byawama ne. Bino Yoba aye watwajijiletu na kwikala wakishinka.

Kino kyasangajikile bingi Yehoba, ne palutwe kacheche wamupesheshe Yoba, byonka byo wamona pa kikye kipikichala. Wamubukile kikola kyanji. Yoba wasemene ne baana bakwabo balambile bingi jikumi, kabiji waikajile na bañombe, mikooko ne bangamela bavula bingi kukila pa boajinga nabo kala.

Nanchi umwakamwanga Yehoba byonka byajinga Yoba nyi? Umvwe wauba bino, Lesa ukakupesha ne obewa. Ukekala na bumi bwa myaka ne myaka kimye ntanda yonse kyo ikalulwa ke yawama byonka byajinga bujimi bwa Edena.