ໂຢບສັດຊື່ຕໍ່ພະເຈົ້າ
ບົດ 26
ໂຢບສັດຊື່ຕໍ່ພະເຈົ້າ
ເຈົ້າຮູ້ສຶກສົງສານຜູ້ຊາຍເຈັບປ່ວຍຄົນນີ້ບໍ? ເຂົາຊື່ໂຢບ. ແລະຜູ້ຍິງຄົນນັ້ນຄືເມຍຂອງເຂົາ. ເຈົ້າຮູ້ບໍວ່ານາງເວົ້າຫຍັງກັບໂຢບ? ‘ຈົ່ງປ່ອຍດ່າພະເຈົ້າແລະຕາຍເຖີດ.’ ຈົ່ງໃຫ້ເຮົາເບິ່ງວ່າເປັນຫຍັງນາງເວົ້າຢ່າງນັ້ນ ແລະເປັນຫຍັງໂຢບຈຶ່ງຮັບຄວາມທຸກທໍລະມານຫຼາຍເຊັ່ນນັ້ນ.
ໂຢບເປັນຄົນສັດຊື່ຜູ້ທີ່ເຊື່ອຟັງພະເຢໂຫວາ. ເຂົາອາໄສໃນແຜ່ນດິນອຶດເຊບໍ່ໄກຈາກການາອານ. ພະເຢໂຫວາຮັກໂຢບຫຼາຍ ແຕ່ມີຜູ້ນຶ່ງທີ່ກຽດຊັງເຂົາ. ເຈົ້າຮູ້ບໍແມ່ນໃຜ?
ຜູ້ນັ້ນຄືຊາຕານພະຍາມານ. ຈື່ໄວ້ວ່າ ຊາຕານເປັນທູດສະຫວັນຊົ່ວທີ່ກຽດຊັງພະເຢໂຫວາ. ມັນສາມາດຊັກຊວນໃຫ້ອາດາມແລະເອວາບໍ່ເຊື່ອຟັງພະເຢໂຫວາ ແລະມັນຄິດວ່າມັນສາມາດຈະຊັກຊວນຄົນອື່ນທຸກຄົນບໍ່ໃຫ້ເຊື່ອຟັງພະເຢໂຫວາໄດ້ດ້ວຍ. ແຕ່ມັນສາມາດເຮັດໄດ້ບໍ? ບໍ່ໄດ້. ຂໍໃຫ້ນຶກເຖິງຜູ້ຊາຍແລະຜູ້ຍິງທີ່ສັດຊື່ຈຳນວນຫຼາຍທີ່ພວກເຮົາໄດ້ຮຽນຮູ້ມາແລ້ວ. ເຈົ້າສາມາດບອກຊື່ໄດ້ຈັກຄົນ?
ຫຼັງຈາກຍາໂຄບແລະໂຍເຊບຕາຍໃນອີຢີບ ໂຢບເປັນຜູ້ສັດຊື່ທີ່ສຸດຕໍ່ພະເຢໂຫວາໃນແຜ່ນດິນໂລກທັງໝົດ. ພະເຢໂຫວາຕ້ອງການໃຫ້ຊາຕານຮູ້ວ່າມັນບໍ່ສາມາດເຮັດໃຫ້ທຸກຄົນເປັນຄົນຊົ່ວ ດັ່ງນັ້ນພະອົງຈຶ່ງກ່າວວ່າ: ‘ຈົ່ງເບິ່ງໂຢບ. ເຂົາສັດຊື່ຕໍ່ເຮົາພຽງໃດ?’
ຊາຕານໂຕ້ຖຽງວ່າ: ‘ເຂົາສັດຊື່ກໍ່ເພາະພະອົງອວຍພອນເຂົາແລະໃຫ້ເຂົາມີສິ່ງທີ່ດີຫຼາຍໆສິ່ງ. ແຕ່ຫາກພະອົງເອົາສິ່ງເຫຼົ່ານີ້ໄປ ເຂົາຈະປ້ອຍດ່າພະອົງທັນທີ.’
ດັ່ງນັ້ນພະເຢໂຫວາກ່າວວ່າ: ‘ເຊີນເຖີດ. ເອົາສິ່ງຂອງເຫຼົ່ານັ້ນໄປໄດ້. ເຈົ້າເຮັດທຸກຢ່າງທີ່ຊົ່ວຕໍ່ໂຢບຕາມຄວາມຕ້ອງການໄດ້. ເຮົາຈຶ່ງຈະຮູ້ໄດ້ວ່າເຂົາຈະສາບແຊ່ງເຮົາຫຼືບໍ. ພຽງແຕ່ເຈົ້າຢ່າຂ້າເຂົາເປັນອັນຂາດ.’
ທຳອິດ ຊາຕານເຮັດໃຫ້ຄົນມາລັກເອົາຝູງງົວແລະຝູງອູດຂອງໂຢບ. ແລະຝູງແກະຂອງເຂົາຖືກຂ້າຕາຍ. ແລ້ວມັນກໍ່ຂ້າລູກຊາຍແລະລູກສາວ 10 ຄົນຂອງໂຢບດ້ວຍລົມພາຍຸອັນແຮງກ້າ. ຖັດຈາກນັ້ນ ຊາຕານໄດ້ຕີໂຢບດ້ວຍຝີຮ້າຍຢ່າງໜັກ. ໂຢບໄດ້ຮັບຄວາມທຸກທໍລະມານຢ່າງຍິ່ງ. ໂດຍເຫດນັ້ນເມຍຂອງໂຢບບອກເຂົາວ່າ: ‘ຈົ່ງປ້ອຍດ່າພະເຈົ້າແລ້ວຕາຍເສຍເຖີດ.’ ແຕ່ໂຢບບໍ່ຍອມເຮັດເຊັ່ນນັ້ນ. ນອກຈາກນີ້ຍັງມີເພື່ອນປອມສາມຄົນມາແລະບອກວ່າ ເຂົາເຄີຍດຳເນີນຊີວິດໃນແນວທາງບໍ່ດີມາກ່ອນ. ແຕ່ໂຢບຍັງຮັກສາຄວາມສັດຊື່ຢູ່ຕໍ່ໄປ.
ທັງນີ້ເຮັດໃຫ້ພະເຢໂຫວາມີຄວາມສຸກຫຼາຍ ແລະຫຼັງຈາກນັ້ນພະອົງອວຍພອນໂຢບ ຕາມທີ່ເຈົ້າເຫັນໃນຮູບຢູ່ຂ້າງລຸ່ມນີ້. ພະເຈົ້າໄດ້ປິ່ນປົວເຂົາໃຫ້ຫາຍຈາກພະຍາດຝີຮ້າຍນັ້ນ. ໂຢບໄດ້ລູກສວຍງາມອີກ 10 ຄົນ ມີຝູງງົວ ຝູງແກະແລະຝູງອູດຫຼາຍກວ່າທີ່ເຄີຍມີເຖິງສອງເທົ່າ.
ເຈົ້າຈະສັດຊື່ຕໍ່ພະເຢໂຫວາຢູ່ເລື້ອຍໆຄືກັນກັບໂຢບບໍ? ຖ້າເຈົ້າສັດຊື່ອີ່ຫຼີ ພະເຈົ້າຈະອວຍພອນເຈົ້າດ້ວຍ. ເຈົ້າຈະສາມາດມີຊີວິດຢູ່ຕະຫຼອດໄປເມື່ອແຜ່ນດິນໂລກນີ້ທັງໝົດຈະຖືກເຮັດໃຫ້ສວຍງາມຄືກັນກັບສວນເອເດນ.
ໂຢບ 1:1-22; 2:1-13; 42:10-17.
