HE MI dam lo tan hian pawi i ti em? A hming chu Joba a ni a, hmeichhia hi a nupui a ni. Joba hnenah enge a sawi i hria em? ‘Pathian anchhia lawh la thi rawh,’ a ti a ni. Chutiang thu a sawina chhan leh Johan chuti khawpa na a tuarna chhan i en ang u.

Joba chu Jehova thu awih mi rinawm a ni a. Kanaan atanga hla lo, Uz ramah a cheng a. Jehova chuan Joba a hmangaih em em a, mahse amah hawtu tuemaw a awm a. Tunge a nih i hria em?

Ramhuai Setana a ni. Setana chu Jehova hawtu, vantirhkoh tha lo a ni tih hrereng la. Adama leh Evi chu Jehova thu a awih lohtir thei a, mi dang reng reng pawh Jehova thu awih lohtir theih a inring a. Mahse a thei em? Thei lo. Kan hriat tawh mipa leh hmeichhe rinawm tam takte kha ngaihtuah teh. Eng zah hming nge i sawi theih?

Aigupta-ah Jakoba leh Josefa an thih hnuah, Joba chu lei chung zawng zawngah Jehova laka mi rinawm ber a ni a. Mi tin tha lo a nihtir thei lo tih Setanan hria se Jehovan a duh a, chuvangin: ‘Joba en teh. Ka laka a rinawmzia hi hmu rawh,’ a ti a.

Setana chuan: ‘Amah mal i sawm leh thil tha tam tak a neih vangin a rinawm a ni. Mahse chung chu i lak bo chuan anchhia a lawh mai ang che,’ tiin a hnial a.

Chuvangin Jehova chuan: ‘Ti ta che. La bo rawh. Joba chunga thil tha lo tih i duh zawng zawng chu ti rawh. Anchhia mi lawh leh lawh loh kan hria ang chu. Tih chu tihlum hlek suh ang che,’ a ti a.

A hmasain Setanan mite chu Joba ran ruai leh sanghawngseite a ruktir a, tin a beramte chu tihhlum an ni a. Tin a fapa leh fanu 10-te chu thlipuiin a tihlum leh a. A hnuah Setana chuan Joba chu he natna rapthlak tak hi a veitir leh a. Chuvang chuan Joba nupui chuan: ‘Pathian chu anchhia lawh la thi rawh,’ a ti a ni. Mahse Joba chuan a ti dawn lo. Thian der pathum pawh an lo kal a, nun tha lova nung a ni tiin an rawn hrilh a. Mahse Joba chu a rinawm zel a.

Chu chuan Jehova a tihlim em em a, milema i hmuh theih ang hian, a hnuah Joba chu mal a sawm a. A natna a tihdam sak a. Joba chuan fa hmeltha zawk 10 leh ran ruai, beram leh sanghawngseite a hmaa a neih let hniha tam a nei a.

Joba angin Jehova lakah i rinawm reng ang em? I rinawm chuan, Pathianin mal a sawm ve ang che. Leilung pum pui hi Eden huan anga mawia siam a nih hunah chatuanin i nung thei ang.