KIBAR 26
Wẽn-sakd a Zoobe
RAO ning sẽn be fotã zugã nimbãaneg pa tar yãmb sɩda? A yʋʋr la a Zoobe. Pag ning sẽn yasã yaa a paga. Yãmb mii a sẽn yet a Zoob bũmb ning bɩ? A yet-a lame t’a tʋʋs Wẽnnaam la a ki tɩ sa. D ges bũmb ning sẽn kɩt t’a gomd woto wã, la bũmb ning sẽn kɩt t’a Zoob namsd wʋsg woto wã.
A Zoob ra vɩɩ Uz tẽngã pʋgẽ. Uz tẽngã pa zãr ne Kanaã ye. A Zoob ra sakda a Zeova wakat fãa, t’a Zeova ra nong-a wʋsgo. La ned a ye n da pa nong a Zoobe. Yãmb mii a soab bɩ?
Yaa a Sʋɩtãana. Yẽ la malɛg-wẽng ning sẽn kis a Zeova wã. A sẽn tõog n kɩt t’a Ãdem ne a Hawa kɩɩs a Zeova noorã, a tagsdame t’a tõe n kɩtame tɩ nebã fãa me kɩɩs a Zeova. La a tõogame bɩ? Ayo. Tags-y rap la pagb nins yell tõnd sẽn zoe n gom seb-kãngã pʋgẽ wã yelle. Bãmb wʋsg saka a Zeova wakat fãa. Yãmb mii kẽer yʋy bɩ? Togs-y tɩ d gese.
A Zakoob ne a Zozɛf ra yaa wẽn-sakdba, la bãmb sẽn ki wã, yaa a Zoob bal n da yaa wẽn-sakd n yɩɩd nebã fãa tẽngã zugu. A Zeova ra ratame t’a Sʋɩtãan bãng t’a pa tõe n kɩt tɩ nebã fãa maan wẽng ye. Rẽ n so t’a yeel a Sʋɩtãan yaa: ‘Ges a Zoob sẽn sakd maam sõma to-to.’
La a Sʋɩtãan leokame yaa: ‘Ad yaa fo sẽn kõ-a bõn-sõma wʋsgã yĩng la a sẽn sakd foo wã. Fo sã n deeg a sẽn tarã fãa, a na n tʋʋsa foo.’
A Zeova yeela a Sʋɩtãan yaa: ‘Reeg a bõn-sõma wã fãa. Nams-a wa f sẽn dat to-to, tɩ d ges a sã n na n sak n tʋʋsa maam. La ra kʋ-a ye.’
A Sʋɩtãan reng n kɩtame tɩ wagda zu a Zoob niisã ne a bõensã la a yʋgma wã, la b kʋ a piisã. A leb n kɩtame tɩ seb-kẽeng kʋ a Zoob kamb 10. Rẽ poore, a loba a Zoob bã-yooko. Bãagã ra namsda a Zoob wʋsgo. Rẽ yĩng la a pagã sẽn yeel-a t’a tʋʋs Wẽnnaam la a ki tɩ sa wã. La a Zoob pa sak n maan dẽ ye. A zo-rãmb a tãab me n wa n yeel-a t’a yaa nin-wẽnga. B yeelame tɩ yaa rẽ yĩng la yɛlã sẽn tar-a wã. B ra pa zo-sõma ye. Baasg zãnga, a Zoob kell n saka Wẽnnaam.
A Zeova sũur yɩɩ noog wʋsg ne a Zoobe, t’a ning-a bark wʋsgo. Yãmb pa ne rẽ fotã zug sɩda? A Zeova sãooga a Zoob bãagã, la a kɩt t’a le paam kamb 10 sẽn yaa kom-neeba. A Zeova kɩtame me t’a paam niisi, bõense, piisi, la yʋgma sõor sẽn ta a sẽn da tar pĩndã naoor a yiibu.
Yãmb me na n saka a Zeova wakat fãa wa a Zoob bɩ? Yãmb sã n maan woto, Wẽnnaam na n ning-y-la barka. A na n kɩtame tɩ y tõog n vɩɩmd wakat sẽn-kõn-sa tẽngã zug sẽn na n lebg neer wa Edɛn sẽn da yaa to-to wã.
