¿A KǑO kúsuchí-iniún xíniún ta̱ kúʼvi̱ yóʼo? Job naníra, ta ñá ñaʼá yóʼo kúú ñá síʼíra. ¿Á xíni̱ún ndáaña káʼa̱nñá xíʼinra? ʼKa̱ʼa̱n chiʼña xíʼin Ndióxi̱ ta kuviúnʼ, káchiñá xíʼinra. Ná kotoyó ndachun káʼa̱nñá ña̱yóʼo xíʼinra, ta ndáa xa̱ʼa kúú ña̱ xóʼvi̱níra.

Ta̱ Job ndinuʼu-inira xi̱kandíxara Jehová. Ta ni̱xi̱yora ñuu Uz ña̱ ndíka̱a̱ yatin xíʼin ñuu Canaán. Xi̱kuʼvi̱kaví-ini Jehová xi̱xinira ta̱ Job, soo ni̱xi̱yo iin na̱ xi̱sa̱a̱-ini xi̱xiniñaʼá. ¿Á xíni̱ún ndáana kúú na̱ xi̱sa̱a̱-ini xi̱xiniñaʼá?

Ta̱ Ndi̱va̱ʼa kúú ta̱ xi̱sa̱a̱-ini xi̱xiniñaʼá. Ndakaʼán, chi ta̱ Ndi̱va̱ʼa yóʼo kúú ta̱ sáa̱-ini xíni Jehová. Ta̱yóʼo kúú ta̱ sa̱ndáʼvi ta̱ Adán xíʼin ñá Eva ña̱ va̱ása níkandíxakana ña̱ ni̱ka̱ʼa̱n Jehová, soo ta̱ Ndi̱va̱ʼa yóʼo nda̱kanixi̱níra ña̱ kuchiñura sandáʼvira ndiʼi na̱ yiví ña̱ kǒo kandíxana ña̱ káʼa̱n Ndióxi̱. Soo, ¿á ni̱kuchiñura sa̱ndáʼvikara inkana? Kǒo níkuchiñura. ¿Á ndákaʼún xa̱ʼa ná si̱ʼí xíʼin ta̱a na̱ xa̱sa̱kuaʼayó xa̱ʼa na̱ ndinuʼu-ini ka̱ndíxa Ndióxi̱? ¿Á kivi ka̱ʼún ki̱vi̱ savana?

Tá ni̱xi̱ʼi̱ ta̱ Jacob xíʼin ta̱ José ñuu Egipto, iinlá ta̱ Job kúú ta̱ ndinuʼu-ini ka̱ndíxa Jehová ña̱ iníísaá ñuyǐví. Jehová xi̱kuni̱ra ña̱ ná kunda̱a̱-ini ta̱ Ndi̱va̱ʼa ña̱ kǒo kuchiñura sandáʼvira ndiʼi na̱ yiví ña̱ keʼéna ña̱ kúni̱ra, ta káchira xíʼinra: ʼKoto ta̱ Job ndinuʼu-inira kándíxara yi̱ʼi̱ʼ.

ʼNdinuʼu-inira kándíxara yóʼó saáchi ku̱a̱ʼání ña̱ va̱ʼa táxiún ndaʼa̱ra, soo tá ná kindaún ndiʼi ña̱ʼa ndaʼa̱ra, nda̱a̱ ka̱ʼa̱n chiʼñara xa̱ʼúnʼ, káchi ta̱ Ndi̱va̱ʼa xíʼin Jehová.

Ta nda̱kuiin Jehová ta káchira: ʼKuaʼán ta kindaa ndiʼún ña̱ʼa ndaʼa̱ra, soo kǒo kaʼníúnra tasaá kunda̱a̱-iniyó á ka̱ʼa̱n chiʼñara xa̱ʼíi̱ʼ.

Ta̱ Ndi̱va̱ʼa xi̱niñúʼura na̱ yiví ña̱ i̱xakuíʼnana kití sa̱na̱ ta̱ Job xíʼin camello sa̱na̱ra ta tí ndikachi sa̱na̱ra ni̱xi̱ʼi̱ ndiʼirí. Ta xi̱niñúʼutura ta̱chí kini ña̱ xa̱ʼníra 10 saá se̱ʼe ta̱ Job. Tándi̱ʼi kiʼin kue̱ʼe̱ ta̱ Job. Ta ndo̱ʼoníra xíʼin kue̱ʼe̱ yóʼo. Xa̱ʼa ña̱yóʼo ni̱ka̱ʼa̱n ñá síʼíra xíʼinra: ʼKa̱ʼa̱n chiʼña xíʼin Ndióxi̱ ta kuviúnʼ. Soo ta̱ Job kǒo níxiniso̱ʼora ña̱ ni̱ka̱ʼa̱n ñá síʼíra. Ta ki̱xi u̱ni̱ na̱ migora, soo su̱ví ndixa migora kúú na̱yóʼo chi ni̱ka̱ʼa̱nna xíʼinra ña̱ kiniva ke̱ʼéra. Ña̱kán ku̱a̱ʼání ña̱ ndóʼora, káchina xíʼinra. Soo ta̱ Job kǒo níxiniso̱ʼora ña̱ ni̱ka̱ʼa̱nna xíʼinra chi ndinuʼuva-inira ka̱ndíxara Jehová.

Ta ni̱kusi̱íkaví-ini Jehová xa̱ʼa ña̱yóʼo. Ta ku̱a̱ʼání ña̱ va̱ʼa ta̱xira ndaʼa̱ ta̱ Job táki̱ʼva xítoún nu̱ú na̱ʼná yóʼo. Sa̱ndáʼara ta̱ Job. Ta ka̱kuka inka 10 se̱ʼera ta̱ liviní ni̱xi̱yo na̱yóʼo, ta ku̱a̱ʼáka kití sa̱na̱ra ni̱xi̱yo nu̱ú tí xi̱kuumiíra tá ya̱chi̱.

Ta yóʼó, ¿á ndiʼi tiempo ndinuʼu-iniún kandíxaún Jehová ta keʼún táʼan ña̱ ke̱ʼé ta̱ Job? Tá ná kandíxaúnra ndiʼi tiempo ku̱a̱ʼá ña̱ va̱ʼa taxira ndaʼún. Va̱ʼa koún ndiʼi tiempo tá ná nduu Ñuʼú yóʼo iin ñuʼú livi táki̱ʼva ni̱xi̱yo ña̱ Edén.