TLAPOUALISTLI 26

Job amo okika toTajtsin Dios

¿AMO tikiknomati nin tlakatl tlen mokokoa? Itoka Job, uan siuatl inamik. ¿Tikmati tlen kiluijtok Job? ‘Xikuijuikalti toTajtsin Dios uan ximiki’. Ma tikitakan tleka ijkon kiluia, uan tleka Job tlajyouijtok miak.

Job amo okika Jehová uan okitlakamatki. Ye ochantiaya itech Uz, tlen amo uejka okatka itech Canaán. Jehová okitlasojtlaya miak, maski ijkon, okatka se akin okikokoliaya. ¿Tikmati akin okikokoliaya?

Satanás noso Diablo. Xikilnamiki, Satanás se ángel tlen amo yolkuali akin kikokolia Jehová. Ye ueli okichi Adán uan Eva amo ma kitlakamatikan Jehová, uan omokuayejyekoaya uelis kichiuas nochtin tlaltikpaktlakamej noijki amo ma kitlakamatikan. Maski ijkon, ¿ueli okichi? Amo. San ximokuayejyeko itech miakej tlakamej uan siuamej itech tlen yotimomachtijkej, akinmej amo keman okikajkej Jehová. ¿Keski tikinmilnamiki?

Satepan omikej Jacob uan José itech Egipto, itech nochi Tlaltikpak Job ye akin okachi amo okika Jehová. Jehová okinekiaya kimatiltis Satanás amo uelis kichiuaskia nochtin tlaltikpaktlakamej ma yetokan amo yolkualmej, uan okilui: ‘Xikita Job. Xikita ken amo nechkaua’.

Satanás okijto: ‘Ye amo mitskaua pampa te tikteochiua uan kipia miak tlamantli tlen kuali. Maski ijkon, tla te tikixtilis nochi tlen kipia, ye mitsuijuikaltis’.

Ik non, Jehová okilui: ‘Xio. Xikixtili nochi tlen kipia. Xikchiuili Job nochi tlen tiknekis. Uan tikitaskej kox nechuijuikaltis. San amo xikmikti’.

Achto, Satanás okichi sekimej tlakamej ma kichtekikan iyolkauan uan icamellos Job, uan ichkauan okinmiktijkej. Uan ika se chikauak ejekatl okinmikti majtlaktli itelpokauan uan ichpokauan. Satepan, Job okipixki nin ueyi kokolistli. Job otlajyoui miak. Ik non, isiua okilui: ‘Xikuijuikalti toTajtsin Dios uan ximiki’. Maski ijkon, Job amo okinek ijkon kichiuas. Noijki, eyi akinmej okijtoayaj okatkaj iyolikniuan oualajkej uan okiluijkej omokokoaya pampa otlajtlakolchi. Maski ijkon, Job amo okika Jehová.

Nin okiyolpakti miak Jehová, uan satepan okiteochi Job, ken tikita itech tlaixkopinal. Okipajti. Jehová okimakak ok majtlaktli ikoneuan kuajkualtsitsintin uan okimakak 1,000 yuntas de reses, 14,000 ichkamej uan 6,000 camellos.

¿Te noijki amo keman tikauas Jehová ijkon ken Job? Tla ijkon tikchiuas, Jehová noijki mitsteochiuas. Uelis tinemis nochipa ijkuak Tlaltikpak mochiuas kuajkualtsin ijkon ken okatka xochitlali Edén.

Job 1:1-22; 2:1-13; 42:10-17.