NA O kwela bohloko monna yo a babjago yo o mmonago mo seswantšhong? Leina la gagwe ke Jobo gomme mosadi yo a nago le yena ke wa gagwe. Na o a tseba gore o reng go Jobo? O re go yena: “Roga Modimo o hwe.” Anke re bone gore ke ka baka la eng a ile a bolela bjalo le lebaka leo Jobo a ilego a tlaišega gakaakaa.

Jobo e be e le monna yo a botegago wa go kwa Jehofa. O be a dula nageng ya Utsi yeo e bego e le kgauswi le Kanana. Jehofa o be a rata Jobo kudu, eupša go be go na le motho yo a itšego yo a bego a hloile Jobo. Na o a tseba gore e be e le mang?

E be e le Sathane Diabolo. Gopola gore Sathane ke morongwa yo mobe yo a hloilego Jehofa. O ile a dira gore Adama le Efa ba se ke ba kwa Jehofa gomme a ipotša gore a ka kgona go dira gore batho ka moka ba se ke ba kwa Jehofa. Eupša na o ile a kgona? Aowa. Anke o fo nagana ka banna le basadi ba bantši ba ba botegago bao re ithutilego ka bona. O ka bolela ba bakae ka maina?

Ka morago ga ge Jakobo le Josefa ba hwile kua Egipita, Jobo e ile ya ba yena motho yo a botegelago Jehofa kudu lefaseng ka moka. Jehofa o be a nyaka go bontšha Sathane gore a ka se kgone go dira gore batho ka moka e be ba babe, ka gona o ile a re go yena: ‘Bona Jobo. Bona kamoo a mpotegelago ka gona.’

Sathane a nganga ka gore: ‘Jobo o go botegela ka gobane o mo šegofaditše le gore o na le dilo tše dintši tše dibotse. Eupša ge o ka mo amoga tšona, o tla go roga.’

Ke moka Jehofa a re: ‘Go lokile. Mo amoge tšona. Mo dire dilo ka moka tše mpe tšeo o di nagannego. Re tla bona ge e ba a tla nthoga. Eupša o se ke wa mmolaya.’

Sa pele, Sathane o ile a dira gore batho ba utswe dikgomo le dikamela tša Jobo gomme ba bolaye dinku tša gagwe. Ke moka a bolaya barwa le barwedi ba gagwe ba 10 ka ledimo. Ka morago ga moo, Sathane o ile a otla Jobo ka bolwetši bjo šoro go etša ge o mmona mo seswantšhong. Jobo o ile a tlaišega kudu. Ke ka baka leo mosadi wa gagwe a ilego a re go yena: “Roga Modimo o hwe.” Eupša Jobo ga se a ka a dira bjalo. Le gona bagwera ba gagwe ba bararo ba maaka ba ile ba tla gomme ba mmotša gore go ra gore o be a ile a itshwara gampe. Eupša Jobo o ile a dula a botega.

Se se ile sa thabiša Jehofa kudu gomme ka morago a mo šegofatša go etša ge o ka bona mo seswantšhong. O ile a mo fodiša bolwetši bja gagwe. Jobo o ile a ba le bana ba bangwe ba 10 ba babotse, a ba le dikgomo, dinku le dikamela tše dintši tše di fetago tšeo a bego a na le tšona pele gabedi.

Na ka mehla o tla botegela Jehofa go swana le Jobo? Ge o ka dira bjalo, gona le wena Modimo o tla go šegofatša. O tla kgona go phela ka mo go sa felego ge lefase ka moka e tla ba e le le lebotse kudu go swana le serapa sa Edene.

Jobo 1:1-22; 2:1-13; 42:10-17.