Ekitebyo 26

Yobu n’Omwesigwa Ahari Ruhanga

NOOHURIRA noosaasibwa ogu mushaija orwaire? Eiziina rye ni Yobu, kandi omukazi ogwo n’omukazi we. Noomanya eki ariyo naagambira Yobu? ‘Kyeena Ruhanga ofe.’ Ka tureebe ahabw’enki yaabaire naabaasa kugamba ekintu nk’ekyo, hamwe n’ahabw’enki Yobu yaabonaboine munonga.

Yobu akaba ari omushaija omwesigwa owaabaire naayorobera Yehova. Akaba naatuura omu nsi ya Uuzi, hatari hare na Kanaani. Yehova akaba naakunda Yobu munonga, kwonka hakaba hariho omuntu owaabaire naamwanga. Noomanya akaba ari oha?

Akaba ari Sitaane Omuregi. Ijuka, Sitaane niwe maraika omubi orikwanga Yehova. Akareetera Adamu na Haawa kugomera Yehova, kandi akaba naateekateeka ngu naabaasa kuhindura n’abandi boona nabo kugomera Yehova. Kwonka akabaasa kukora ekyo? Ngaaha. Banza oteekateekye aha bashaija n’abakazi baingi abeesigwa abu twegireho. Ni bangahi abu orikubaasa kwijukaho?

Bwanyima ya Yakobo na Yosefu kufeera omuri Misri, Yobu niwe muntu owaabaire naakirayo kuba omwesigwa ahari Yehova omu nsi yoona. Yehova akaba naayenda kumanyisa Sitaane ngu tarikubaasa kureetera abantu boona kuba babi, nikwo kugira ati: ‘Reeba Yobu. Reeba oku ari omwesigwa ahariinye.’

Sitaane nikwo kuhakanisa naagira ati: ‘N’omwesigwa ahabw’okuba nomuheereza emigisha kandi aine ebintu birungi bingi. Kwonka ku waakubimwihaho, naija kukwehakana.’

Yehova nikwo kugira ati: ‘Bimwiheho. Mukoreho ekibi kyona eki orikwenda. Nitwija kureeba yaaba arankyeene. Kwonka reeba ngu we, tiwamwita.’

Ekyabandize, Sitaane akareetera abashaija kwiba ente n’engamira za Yobu, n’entaama ze zikeitwa. Bwanyima yaita abatabani n’abahara ikumi omu ihunga. Ekyakuratsireho, Sitaane yaarwaza Yobu endwara mbi egi. Yobu yaabonabona munonga. Niyo nshonga ahabw’enki omukazi wa Yobu yaamugambiire ati: ‘Kyeena Ruhanga ofe.’ Kwonka Yobu akaba atarikubaasa kukora ekyo. Kandi hoona banywani ba Yobu bashatu abatari b’amazima baija baamugambira ngu akaba naatwaza kubi amagara ge. Kwonka Yobu yaaguma ari omwesigwa.

Eki kikashemeza Yehova munonga, kandi bwanyima yaaheereza Yobu emigisha, nk’oku orikureeba aha omu kishushani. Akamukiza endwara ye. Yobu yaagira abandi baana 10 barungi munonga, kandi yaagira ente, entaama, na n’engamira emirundi ebiri ezirikukira aha zi yaabaire aine omu kubanza.

Noija kuguma ori omwesigwa obutoosha ahari Yehova nka Yobu? Ku oraagume ori omwesigwa, naiwe Ruhanga naija kukuha emigisha. Noija kubaasa kugumaho ebiro byona obu ensi yoona eribonezibwa kushusha nk’omusiri Edeni.

Yobu 1:1-22; 2:1-13; 42:10-17.