ASOO nrenya ɛhye mɔɔ ɛnde kpɔkɛ la anwo ɛnyɛ wɔ alɔbɔlɛ? Bɛfɛlɛ ye Dwobu, na ɔ ye a le raalɛ ne. Asoo ɛze edwɛkɛ mɔɔ ɔlɛka yeahile Dwobu la ɔ? ‘Tendɛ tia Nyamenle na wu.’ Maa yɛnlea deɛ mɔɔ ɔti ɔhanle edwɛkɛ zɛhae, nee mɔɔ ɔti Dwobu nwunle amaneɛ kpole ɛhye la.

Dwobu le sonla mɔɔ di nɔhalɛ mɔɔ diele Gyihova a. Ɛnee ɔwɔ Ɛɛze azɛlɛ ne, mɔɔ bikye Keena la azo. Ɛnee Gyihova kulo Dwobu kpole kpalɛ, noko awie bie wɔ ɛkɛ mɔɔ kpɔ ye a. Ɛze ahenle holɛ ɔ?

Seetan Abɔnsam ɔ. Kakye kɛ Seetan a le anwumabɔvolɛ ɛtane ne mɔɔ kpɔ Gyihova la. Ɔholale ɔmanle Adam nee Yive yɛle Gyihova anwo anzosesebɛ, na ɛnee ɔdwenle kɛ ɔbahola yeamaa awie biala noko ayɛ Gyihova anwo anzosesebɛ. Na asoo ɔholale ɔyɛle zɔ? Kyɛkyɛ. Wɔmɔ nea mrenya nee mraalɛ nɔhavoma mɔɔ yɛzukoa bɛ nwo debie la. Nyɛ a ɛbahola wɔabobɔ bɛ aluma a?

Mɔɔ Gyekɔbo nee Dwosefi wule wɔ Yigyibiti la anzi, Dwobu a ɛnee le sonla mɔɔ di nɔhalɛ kpalɛ kpalɛ maa Gyihova wɔ azɛlɛ ne amuala azo a. Ɛnee Gyihova kpondɛ kɛ Seetan nwu ye kɛ ɔnrɛhola ɔnrɛmaa awie biala ɛnrɛyɛ ɛtane, yemɔti ɔhanle kɛ: ‘Wɔnwu Dwobu. Wɔnwu kɛzi ɔdi nɔhalɛ ɔmaa me la.’

Seetan buale kɛ: ‘Ɔdi nɔhalɛ, ɔluakɛ wɔyila ye yɛɛ ɔlɛ ninyɛne mgbalɛ dɔɔnwo. Na saa ɛdie ɛhye mɔ ɛfi ɔ sa nu a, ɔbadendɛ yeatietia wɔ.’

Yemɔti Gyihova zele kɛ: ‘Kɔ zolɛ. Die debie biala fi ɔ sa nu. Yɛ Dwobu debie biala mɔɔ ɛkulo la. Na nea saa ɔbadendɛ yeatia me a. Noko nea na wɔangu ye.’

Mɔɔ lumua la, Seetan manle menli wuale Dwobu nlankɛ nee ye afunlumu ne mɔ, na bɛhuhunle ye mboane ne mɔ. Akee ɔmanle ahumu dule hunle ɔ mra mrenya nee mraalɛ 10. Ɛhye anzi Seetan manle ewule ɛtane ɛhye bɔle Dwobu. Dwobu vɛle kpalɛ. Na yemɔti a ɔ ye zele ye kɛ: ‘Tendɛ tia Nyamenle na wu’ a. Noko Dwobu anyɛ zɔ ɛlɛ. Eza ɔ gɔnwo mɔ alane nsa bie rale razele ye kɛ yebɔ ɛbɛla ɛtane. Noko Dwobu hɔle zo lile nɔhalɛ.

Ɛhye manle Gyihova anye liele kpalɛ, na amozii ɔyilale Dwobu, kɛmɔ ɛkola ɛnwu ye wɔ nvoninli ye anu la. Ɔmanle ɔdele kpɔkɛ. Dwobu wole mralɛ 10 fofolɛ mɔɔ anwo yɛ fɛ, na ɔnyianle ye nlankɛ, ye mboane nee ye afunlumu ne mɔɔ ɔlɛ ye dɛba la mɔnwo.

Asoo ɛbali nɔhalɛ wɔamaa Gyihova dahuu kɛ Dwobu? Saa ɛyɛ ye zɔ a, Nyamenle bayila ɛdawɔ noko. Ɛbahola wɔadɛnla aze dahuu wɔ mekɛ mɔɔ bɛbayɛ azɛlɛ ye azo amuala kɛnlɛma kɛ Yidɛn tola ne ala la.