Relato 26: Jòb A Keda Fiel na Dios
BO TA sinti duele di e hòmber enfermo ei? Su nòmber ta Jòb, i e señora ta su esposa. Bo sa kiko e señora ta bisando Jòb? ‘Plega Dios i muri.’ Laga nos mira ta kon bin e por a bisa un kos asina, i pakiko Jòb a sufri asina tantu.
![Jòb tin blufein](https://assetsnffrgf-a.akamaihd.net/assets/l/my/my_PA/26.jpg)
Jòb tabata un hòmber fiel ku a obedesé Yehova. El a biba na e tera di Uz, no leu for di Kánaan. Yehova a stima Jòb masha hopi, pero tabatin un otro persona ku a odi’é. Bo sa ken a odi’é?
Esei tabata Satanas e Diabel. No lubidá, Satanas ta e mal angel ku ta odia Yehova. Satanas a logra pone Adam ku Eva desobedesé Yehova, i el a pensa ku e por hasi tur otro hende tambe desobedesé Yehova. Pero, el a logra hasi esei? Nò. Djis kòrda riba e kantidat di hòmber- i muhénan fiel ku nos a siña kaba di dje. Kuantu di nan bo por menshoná?
Despues ku Jakòb i Hosé a muri na Egipto, Jòb tabata e hòmber mas fiel na Yehova den henter mundu. Yehova kier a laga Satanas sa ku e no por hasi tur hende bira mal hende, i p’esei Dios a bis’é: ‘Wak Jòb. Mira ki fiel e ta keda na mi.’
Satanas a argumentá: ‘E ta keda fiel pasobra bo ta bendishon’é i e tin hopi kos bon. Pero si bo kita eseinan, lo e maldishoná bo.’
P’esei Yehova a bisa: ‘Hasié numa. Kita tur kos. Hasi kuantu kos malu ku bo kier ku Jòb. Nos lo mira si e ta plega mi. Solamente hasi sigur di no mat’é.’
Promé, Satanas a pone hende hòrta tur baka i kamel di Jòb, i a mata su karnénan. Anto Satanas a mata su 10 yu hòmber- i muhénan den un tormenta. Despues, Satanas a duna Jòb un malesa teribel. Jòb a sufri masha hopi. P’esei Jòb su esposa a bis’é: ‘Plega Dios i muri.’ Pero Jòb no a hasié. Ademas, tres amigu falsu a bini i a bis’é ku el a hiba un mal bida. Pero Jòb a sigui fiel.
Esei a hasi Yehova masha kontentu, i despues el a bendishoná Jòb, manera bo por mira riba e plachi. Dios a kur’é di su malesa. Jòb a haña 10 bunita yu mas, i a haña dos bes mas tantu baka, karné i kamel ku e tabatin promé.
Abo lo keda semper fiel na Yehova meskos ku Jòb? Si bo hasié, Dios lo bendishoná abo tambe. Bo por biba pa semper ora Dios hasi henter e tera mes bunita ku e hòfi di Edén.
Jòb 1:1-22; 2:1-13; 42:10-17.
![Jòb i su famia](https://assetsnffrgf-a.akamaihd.net/assets/l/my/my_PA/26a.jpg)
Pregunta
- Ken Jòb tabata?
- Kiko Satanas a purba hasi, pero, el a logra?
- Kiko Yehova a permití Satanas hasi, i pakiko?
- Pakiko Jòb su esposa a bis’é pa “plega Dios i muri”? (Wak e plachi.)
- Manera bo por mira riba e di dos plachi, kon Yehova a bendishoná Jòb, i pakiko?
- Si nos ta fiel na Yehova meskos ku Jòb, ki bendishon nos lo risibí?
Preguntanan adishonal
- Lesa Jòb 1:1-22.
Kon kristiannan djawe por imitá Jòb? (Jòb 1:1; Fil. 2:15; 2 Ped. 3:14)
- Lesa Jòb 2:1-13.
Kon Jòb i su esposa a reakshoná na dos manera nèt kontrali di otro ora Satanas a manda persekushon riba nan? (Jòb 2:9, 10; Pro. 19:3; Mik. 7:7; Mal. 3:14)
- Lesa Jòb 42:10-17.
Kon e rekompensa ku Jòb a risibí ta similar na loke Hesus a risibí debí ku el a keda fiel durante su bida riba tera? (Jòb 42:12; Fil. 2:9-11)
Kon e bendishonnan ku Jòb a risibí pa motibu ku el a mantené su integridat na Dios ta animá nos? (Jòb 42:10, 12; Heb. 6:10; Sant. 1:2-4, 12; 5:11)