¿LA KʼÄX kanaʼ che wajun achi riʼ? Ubʼiʼ Job, wajun ixoq are rixoqil. ¿La awetaʼm su tijan kubʼij che? ‹Chaxutuj ri Ajawaxel, tekʼuriʼ chatkamoq›, xchaʼ. Chqilampeʼ suche wajun ixoq xubʼij wariʼ, xuqujeʼ suche ri Job kʼo chupam wajun kʼäx.

Ri Job sukʼalaj achi che xunimaj ri Jehová. Job kʼo pa ri tinamit ubʼiʼ Uz, xa naqaj kʼo che Canaán. Jehová sibʼalaj kraj ri Job. Kʼo jun chik che xa itzel kril ri Job. ¿La awetaʼm jachin laʼ?

Are ri Satanás. Masach chawe, Satanás are ri itzel ángel che sibʼalaj riwal che Jehová. Satanás xubʼano che Adán rukʼ Eva xeniman ta che ri Jehová xuqujeʼ xubʼij che kkunik kubʼano che ronojel täq winaq keniman täj. ¿La xkunik xubʼan wariʼ? Xkun täj. Masach chawe ronojel täq winaq che xkebʼan e sukʼalaj täq winaq. ¿Jampaʼ awetaʼm kibʼiʼ?

Chiʼ ri Jacob xuqujeʼ ri José e kamnäq chik pa Egipto, Job are xubʼana ri winaq sukʼ chuwäch ri Jehová cho ronojel uwäch Ulew. Ri Jehová xraj xukʼut che Satanás che kkun täj kubʼan chike ronojel täq winaq che kkebʼan itzel, Jehová xubʼij che ri Satanás: ‹Chawilampeʼ ri Job. Che qastzij sukʼ cho nuwäch›.

‹Job sibʼalaj sukʼ›, xchaʼ ri Itzel, xa rumal che ‹at ayaʼom utzil puwiʼ xuqujeʼ xiw ri utz ayaʼom che. Chawesaj ronojel che, chawilampeʼ we katuxutuj täj›.

Rumal waʼ ri Jehová xubʼij: ‹Jat. Chawesaj che, ronojel kawaj. Chaya täq kʼäx che, che kawaj. Chiʼ kqil wi we kinuxutuj. Xiw kinbʼij chawe che kakamsaj täj›.

Nabʼe, ri Satanás xubʼano che xepe nikʼaj achijabʼ xkelqʼaj bʼi ronojel täq uchikop ri Job. Ronojel täq uchij xekamik. Xuqujeʼ xeʼukamsaj ri 10 ralkʼwal ri Job chupam jun nimalaj kaqiqʼ, o tew. Tekʼuriʼ xukoj wajun itzelalaj yabʼil che ri Job. Ri Job xqaj pa jun nimalaj kʼäx. Rumal waʼ rixoqil xubʼij che: ‹Chaxutuj ri Ajawaxel, tekʼuriʼ chatkamoq›. Ri Job xraj täj xubʼan wariʼ. Xuqujeʼ xepe oxibʼ achijabʼ, ubʼixik che täq urachʼil, xeʼok che ubʼixik che ri Job che xa itzel winaq. Ri Job xuya ta kan ubʼanik sukʼ che ri Jehová.

Rumal wariʼ ri Jehová xkikotik, tekʼuriʼ xuya kʼi täq utzilal puwiʼ ri Job. Chawilampeʼ chike täq xuya che. Ri Job xekʼeje chi na e 10 ralkʼwal, xuqujeʼ ri Jehová xuya sibʼalaj e kʼi täq chiköp che, are kʼi chuwäch ri kʼo kan rukʼ ojer.

¿La sukʼ kabʼan na che ri Jehová junam rukʼ Job? We jeʼ, ri Ajawaxel kuya nim täq utzilal pawiʼ. Kariq na akʼaslemal kʼot ukʼisik chiʼ ruwäch Ulew kubʼan junam rukʼ ri ojer kotzʼiʼjalaj ulew ubʼiʼ Edén.