MAWA asara mo ndali ti zo ti kobela so? Iri ti lo ayeke Job, na wali so ayeke na tere ti lo so, wali ti lo la. Mo hinga tënë so lo yeke tene na Job? Lo tene: ‘Zonga Nzapa na mo kui.’ Me lo tene tongaso ngbanga nyen, na ndali ti nyen si Job abâ pasi mingi so?

Job aduti lani be-ta-zo na Jéhovah na lo mä yanga ti lo lakue. Lo yeke na kodoro ti Uz so ayo pëpe na sese ti Canaan. Jéhovah andoye Job mingi, me mbeni zo ayeke dä so ake Job mingi. Zo so ayeke zo wa?

A yeke Satan Zabolo, sioni ange so ake Jéhovah. Satan awara lege ti pusu Adam na Eve ti ke yanga ti Nzapa, na lo bâ lo tene lo lingbi ti pusu tanga ti azo kue ti ke yanga ti Jéhovah nga. Me lo wara lani lege ti sara ni? Oko pëpe. Dabe ti mo na akoli nga na awali mingi so aduti be-ta-zo na Nzapa, so e manda ye na ndo ti ala awe. Mo lingbi ti diko oke na popo ti ala?

Na peko ti kuâ ti Jacob na ti Joseph na Égypte, Job ayeke lani zo so ayeke be-ta-zo ahon azo kue na ndo lê ti sese kue. Jéhovah aye si Satan ahinga so lo lingbi ti sara pëpe si azo kue aga azo ti sioni. Ni la lo tene: ‘Bâ Job. Bâ tongana nyen lo yeke be-ta-zo na mbi.’

Satan akiri tënë, lo tene: ‘Lo yeke be-ta-zo na mo ngbanga ti so mo iri tënë nzoni na ndo ti lo, na lo wara mosoro mingi. Me tongana mo zi aye so na tïtî lo, lo yeke zonga mo ande.’

Tongaso Jéhovah atene: ‘Gue. Zi aye so na tïtî Job. Sara sioni kue so mo ye ti sara na lo. E yeke bâ wala lo yeke zonga mbi. Me, fâ lo pëpe.’

Kozoni, Satan asara si azo anzi abagara na achameau, na ala fâ angasangbaga ti lo. Na pekoni, lo fâ amolenge ti lo ti koli na ti wali 10 na yâ ti mbeni kota pupu. Nga, lo bi kota kobela so na tere ti Job si Job abâ pasi mingi. A yeke ndali ni la si wali ti Job atene na lo: ‘Zonga Nzapa na mo kui!’ Me Job ayeke sara tongaso pëpe. Nga, akamarade ti lo ota aga, na ala tene na Job so lo sara aye ti sioni na yâ ti fini ti lo. Me atâa so kue, Job angbâ be-ta-zo.

Ye so azia ngia na bê ti Jéhovah mingi, na Jéhovah airi tënë nzoni na ndo ti Job, tongana ti so mo bâ na lê ti foto so. Jéhovah azi kobela ni na tere ti lo. Job akiri adü apendere molenge 10, nga wungo ti abagara, ti achameau na ti angasangbaga so lo wara ayeke fani use ahon ti kozoni.

Mo yeke duti lakue be-ta-zo na Jéhovah tongana Job? Tongana mo sara tongaso, Nzapa ayeke iri tënë nzoni na ndo ti mo nga. Mo lingbi ande ti duti na fini lakue lakue, na ngoi so sese ni kue ayeke ga pendere tongana yaka ti Eden.