TALA 26
Faamaoni Iopu i le Atua
PE E te faanoanoa ea ona o lena tamaloa maʻi? O Iopu ma lana avā lena. Pe e te iloa lana tala lena e fai i a Iopu? ‘Faifai ia i le Atua ona e oti ai lea.’ Sei o tatou vaai pe ai se ā, ma ai se ā foi na oo ai na puapuaga e tele i a Iopu.
O Iopu o se tagata faamaoni e usiusitai i a Ieova. Sa nofo o ia i Usa e le mamao mai Kanana. Sa alofa tele Ieova i a Iopu, ae e i ai le isi e ita tele o ia i a Iopu. Pe e te iloa o ai?
O Satani le Tiapolo. Manatua, o le agelu leaga e ita i a Ieova. O ia na mafua ai ona le usiusitai Atamu ma Eva i a Ieova, ma ua ia manatu e mafai ona ia faia uma isi ia le usiusitai i a Ieova. Ae sa ia mafaia ea? E leai. Sei mafaufau i le toatele o isi tagata faamaoni sa tatou talanoa i ai. Pe toafia e mafai ona e faaigoaina?
Ina ua feoti Iakopo ma Iosefa, ona avea lea o Iopu ma tagata e sili atu le faamaoni i le lalolagi. Sa faailoa atu e Ieova i a Satani na te le mafai ona faaleagaina tagata uma lava, i lona fai atu: ‘Vaai i a Iopu ma lona faamaoni mai i a te aʻu.’
‘O loo faamaoni ia,’ o le finau mai lea a Satani, ‘auā ua e faamanuia iā te ia. Ae afai o le a e aveesea ana mea, ona ia faifai ai lea iā te oe.’
Ona fetalai atu lea o Ieova: ‘Ina alu ia. Ave ese uma ana mea. Fai uma mea leaga e te manao e fai i a Iopu. Ona ta vaai lea pe faifai mai i a te aʻu. Ae aua e te fasiotia o ia.’
Muamua, sa faapogaia e Satani ni tamaloloa e gaoi povi ma kamela ma tapē mamoe a Iopu. Ona ia fasiotia lea o ona atalii ma ona afafine e 10 i le afā. Ona taia lea e Satani o Iopu i lona maʻi leaga tele. Na tigaina Iopu. O le mafuaaga lena na fai atu ai lana avā: ‘Faifai ia i le Atua ona e oti ai lea.’ Ae sa le faia e Iopu. Sa fai atu foi ana uo pepelo na ola ia i se olaga leaga. Ae na faamaoni pea Iopu.
Na fiafia tele Ieova, mulimuli ane sa ia faamanuia i a Iopu pei ona e vaaia i le ata. Sa ia faamalolo lona maʻi. Sa toe i ai le fanau e 10 mananaia a Iopu, ma toe faaluaina le tele o ana povi, mamoe ma kamela e sili i lo ana mea muamua.
Pe o le ā e faamaoni i a Ieova e pei o Iopu? Afai o le a e faia, e faamanuia oe e le Atua. O le a e ola e faavavau pe a toe faia ia manaia le lalolagi e pei ona sa i ai i le faatoaga o Etena.
