ISTÓRIA 26
Job fiar-metin ba Maromak
HAREE ba ema moras neʼe. Koitadu, loos ka lae? Nia naran Job, no feto neʼe mak nia feen. Hatene saida mak nia hatete ba Job? ‘Hatete-aat Maromak no mate.’ Mai ita haree tansá nia koʼalia hanesan neʼe, no tansá Job terus tebes.
Job mak ema neʼebé fiar-metin no halo tuir Jeová. Nia moris iha rai Uz, la dook husi Kanaan. Jeová hadomi tebes Job, maibé iha ida seluk neʼebé odi nia. Hatene sé?
Nia mak Diabu Satanás. Hanoin-hetan, Satanás mak anju aat neʼebé odi Jeová. Nia konsege halo Adão no Eva la halo tuir Jeová, no nia hanoin katak nia bele mós halo ema hotu la halo tuir Jeová. Maibé, nia konsege ka lae? Lae. Hanoin toʼok, ita aprende tiha ona kona-ba mane no feto barak neʼebé fiar-metin ba Jeová. Bele temi sira balu nia naran?
Depois Jacob no José mate iha Ejitu, Job mak ema neʼebé fiar-metin liu ba Jeová iha mundu tomak. Jeová hakarak Satanás hatene katak Satanás la bele halo ema hotu sai aat, nuneʼe Jeová hatete: ‘Haree ba Job. Nia fiar-metin mai haʼu.’
Satanás hatán fali: ‘Nia fiar-metin ba Ita tanba Ita fó bensaun ba nia, no nia iha buat diʼak barak. Maibé, se Ita halakon buat hotu neʼe husi nia, nia sei hatete-aat Ita.’
Entaun Jeová dehan: ‘Halo deʼit. Halakon buat hotu neʼebé nia iha. Halo aat ba Job. Ita sei haree, nia hatete-aat haʼu ka lae. Maibé, keta oho nia.’
Primeiru, Satanás halo ema naʼok Job nia karau no kuda-kamelu sira, no Satanás oho ninia bibi sira. Depois, nia oho Job nia oan naʼin-10 ho anin-fuik. Tuirmai, Satanás fó moras aat neʼe ba Job. Job terus tebetebes. Tan neʼe, Job nia feen dehan ba nia: ‘Hatete-aat Maromak no mate.’ Maibé, Job la halo tuir. No mós, kolega falsu naʼin-tolu mai no hatete katak Job halo buat neʼebé aat iha ninia moris. Maibé, Job fiar-metin nafatin ba Jeová.
Ida-neʼe halo Jeová kontente tebes, no depois, nia fó bensaun barak ba Job, hanesan ó bele haree iha dezeñu neʼe. Nia fó isin-diʼak ba Job. Job iha oan naʼin-10 tan neʼebé bonitu-bonita, no nia karau, bibi no kuda-kamelu sai barak dala rua liu fali uluk.
Ó sei sempre fiar-metin ba Jeová hanesan Job ka lae? Se ó halo nuneʼe, Maromak mós sei fó bensaun ba ó. Ó bele moris rohan-laek kuandu mundu tomak sei sai furak hanesan jardín Eden.
